Paagi sa pangampanya
JAV, BANATI! - Javier Y. Tapulado (Banat) - April 15, 2019 - 12:00am

Hugaw ang politika sa Pilipinas. Sama kahugaw sa basurang giutingkay sa mga iro, iring ug Ilaga ang ilawom nga bahin aron moalisngaw ang kabaho sa nagkadaiyang matang sa hugaw nga alang nilang mga mananap, mga lamiang pagkaon nga makatagbaw sa nagkutoy nilang tiyan panahon sa kagutom, diin sila nagbugno, nagpinahitay ug nag-ilog kinsay makaangkon sa bililhong bukog.

Ning mga adlaw nga gigahin alang sa pagpangampanya sa mga kandidato nga gustong magpapili ning umaabot May 13 midterm election, sagad kanila ikatandi sa iring ug iro nga kusog kaayong magkinawrasay ug magpinaghotay diha sa ilang pagdiskurso atubangan sa dakong lawod sa katawhan.

Imbes ang matahom nga plataporma maoy ilang iladlad sa publiko, nag-iyahay hinuog sinabligay’g lapok ang isig ka kaatbang, diin ultimong kalang-og sa binuhatan niini kaniadto nga unta hagbay rang gilubong sa kalimot, gikuykoy taman sa ginhawa aron lamang magkalapok ang puting sinina nga gisul-ob. Kini ang hinungdan nga usahay mosangko ang gubot sa pulitika ngadto sa pagpinatyanay.

Hinuon, dinhi sa ato, taliwala sa nagkainit nga binatoay sa mga sensitibong isyu nga giyagyag sa masig ka habig nilang Mayor Tommy Osmeña ug Bise Mayor Edgardo Labella, kinsa pulos magpapili sa pagkamayor ning dakbayan sa Sugbo, mailhan nga sila parehong mahadlokon sa Diyos.

Busa kutob ra sa pagrinakrakay og mahait nga pulong.

Sa tinuoray lang, sikit ang laban nilang duha. Kadto lang gitabonan ang nawong ni Osmeña sa poster ni Labella nga gipapilit sa bungbong, pagkaugma, may misapaw sab sa hitsura ni Labella aron ang kang Osmeña mao na poy maibabaw.

Dinhi, mailhan, unsa ka-loyal ang ilang mga dumadapig.

Sagad, mao gyud ni mahitabo panahon sa pangampanya. Kon unsay gidili sa Commission on Elections, pirmeng gisupak sa mga kandidato. Nga sa ato pa, way mapili.

Maayo pa kadtong gibuhat sa usa ka kandidata. Kay bisag luhong sinina iyang gisul-ob sa pagpangampanya, ultimong bulingit nga kabos, iya pong gigakos dihang mihangop niya.

Dili kay usa lang, duha kondili daghan gyod. May pipila pa, nga nanimahong buog. 

Pero human makapanamilit sa mga dumadapig, nagdali siyang misakay sa iyang kotse.

Ug didto sa sulod, hapit na lang niya ikaligo ang alcohol nga gihaplas halos sa tibuok niyang lawas. Hala, no?

PANGAMPANYA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with