Kinopyahay sa palusot
Di orihinal sa tulo ka tuig nga pamunoan ni Presidente Rodrigo Duterte ang pagpangangkon nga nasulbad ang problema pinaagi sa pag-usab sa mga sukdanan sa problema. Nangopya ra sila sa siyam ka tuig nga pamunoan ni kanhi presidente ug karon House Speaker Gloria Macapagal-Arroyo, suod nga alyado sa politika sa mga Duterte.
Di sab ang Philippine Statistics Authority (PSA) ang unang buhatan ubos sa pamunoang Duterte nga nangangkon og kasulbaran sa problema pinaagi sa pag-usab sa kahulogan sa problema. Igo lang siya nga nangopya sa Department of Labor and Employment (DOLE).
* * *
Nganong nangangkon ang PSA nga naibanan ang kakabos sa katawhang Pilipinhon sa niaging tuig: Niinsistir sila nga ang maisip nga kabos mao ang mga pamilya nga may lima ka sakop nga may binuwan nga kita nga P10,481 paubos; sukwahi sa pangangkon ni Kalihim Ernesto Pernia sa National Economic and Development Authority (NEDA) nga ang usa ka pamilya makaangkon og disente nga pagpuyo kun mokita og labing menos P42,000 ang buwan.
Tungod sa pagbuot-buot sa PSA pagpaubos sa poverty line, naibanan ang nahimutang sa ubos ug nadugangan ang na-ibabaw.
* * *
Nisunod ra hinuon ang PSA sa pangangkon sa DOLE sa niaging tuig nga nasulbad nang problema sa ka way trabaho sa Pilipinas human nila giusab ang definition sa unemployment:
• Di angayng iphon nga way trabaho ang mga way trabaho apan may laing panginabuhi (bahala na kon mahimong namaligya sa kadalanan kay way kasudlang trabaho); ug
• Di angayng iphon nga way trabaho ang mga way trabaho nga wa mangita og trabaho (bahala na kun di sila tapolan apan way trabahong nitukma sa ilang nakamaohan).
* * *
Ug nadasig ang pamunoang Duterte sa pagsunod sa talagsaong paagi sa pamunoang Arroyo pag-insistir nga nasulbad na ang kakuwang sa classrooms gikan sa 2001 ngadto sa 2010. Human nitaho ang Department of Education (DepEd) nga nagsugwak gyud ang gidaghanon sa mga tinun-an kun itandi sa classrooms nga natukod sa gobiyerno.
Inay mohingusog sa pagtukod og dugang classrooms, gipatuman ni Arroyo ang mas laktod nga sulbad: Gibuak-buak ang mga tinun-an ngadto sa tulo ka shifts sa buntag, hapon ug gabii, bahala na kun mosamot pagtibugsok ang kalidad sa edukasyon. [email protected]
- Latest
