Sulbad sa kakabos
Ang mokaon og pungku-pungko sa pamahaw, paniudto o panihapon mangita sa mga putahe nga barato, lami ug makabusog.
Ang bentaha sa nanguhong nga mga pungku-pungko mao ang mas ubos nga presyo (mas barato kay sa mga karenderiya kay gawas nga way giabangan nga luna, wa say lamesa, lingkoranan, plato, kutsara ug baso) ug paspas nga serbisyo (di na magpaabot, mahimong diretso nga mokuha dayong hamong sa pagkaon).
Kun makakaon og tulo ka puso (tag-P4 ang buok) ug usa ka ginabot (P15), di ka pobre segun sa Philippine Statistics Authority (PSA).
* * *
Matud sa mga eksperto sa PSA, ang mogasto og sobra sa P16.30 matag kaon di pobre.
Ang kabus mao ang mga pamilya nga may lima ka sakop nga mokita og P10,481 matag buwan.
Sa ato pa, ang nagdawat og minimum nga suholan nga P11,000 ang buwan naa sa ibabaw sa poverty line.
Matud sa PSA ang kabus nga mga pamilya mogasto og binuwang P7,337 sa pagkaon.
Ang nahibiling P3,144 gigahin sa abangan sa bay, sinina, tambal, edukasyon, plitehan, bayranan sa tubig ug kuryente ug ubang gastohan.
* * *
Sa ato pa, ang mga nakabayad sa inusbawan nga plitehan sa buses ug mini buses ug sa tikas nga plitehan sa PUJs (kay P7 ang gikolekta bisan P6.50 rang minimum ug nag-ung-ong na sang dakong uminto), di pobre.
Sa ato pa, ang mga nakaabang sa ilang kuwarto, nakabayad sa VECO ug MCWD, nakapatambal sa ilang masakiton ug nakapalit og uniporme ug sapatos sa ilang mga tinun-an di pobre.
* * *
Kinsa ra man diay ang mga pobre kansang gidaghanon giangkon sa PSA nga nitidlom sa niaging tuig?
• Ang mga di kaabot bisan sa mga presyo sa pungku-pungko;
• Ang mga namahala pagpuyo sa daplin sa dan o sapa, bahala nang hulga sa demolisyon, basta wa lay abangan;
• Ang mga naghuwamay og sinina ug nagpakilimos sa mga politiko pagpa-ospital sa ilang mga masakiton;
• Ang mga bata nga wa mag-eskuyla kay libre tuod ang matrikula apan way plite, bawon, ni ikabayad sa mga amotan sa eskuylahan; ug
• Ang mga pamilya nga way koneksiyon sa tubig ug suga ug maoy labing mameligro sa sunog ug sakit.
* * *
- Latest
