Good luck sa mga migradwar

Mga napulo ka tuig ang nakalabay, wala kaayoy daghang migradwar sa kolehiyo maong nahulga ang nasud sa paghatag og kuwalipikadong mga empleyado. Basi kini sa pamahayag sa National Statistics Coordination Board (NSCB) nga napatik sa pamantalaang The Manila Times.

Ang alarma milanog dihang gikomparar sa NSCB ang gidaghanon sa mga migradwar sa kolehiyo sa milabay nga napulo ka tuig diin nagpakita nga aduna lamay 481,862 sa pagsaka sa gidaghanon niini sa tuig 2010 gikan sa 363,340 nga gidaghanon niini sa tuig 2001.

Apan paglabay sa lima ka tuig, ang talaan sa Department of Labor and Employment nagpakita nga aduna nay 656,284 ka mga gradwado sa kolehiyo sa 1.29 ka milyon ka mga aplikante og trabaho nga nakig-kompetensiya sa 4.3 ka milyon ka mga trabaho nga bakante sa sulod ug gawas sa nasud nga gitanyag sa mga job fairs nga gipahigayon niadtong tuig 2014 ug 2015.

Sulod sa duha ka tuig nga job fairs, samtang ang gidaghanon sa mga mi-apply misaka apan ang gidaghanon sa mga na-hire miubos. Sa 487,640 ka mga applicants sa tuig 2015, moabot lamang sa 135,059 ang nadawat ug sa tuig 2014, moabot lamang usab sa 255,498 ang nadawat sa 798,000 ka mga aplikante.

Ang nasud nakahimo sa pagpasaka sa human capital niini ug dili lamang sa mga kuwalipikado nga trabahante.

Apan ang tanang sektor nga responsable sa pagmugna sa human capital ug sa paggamit niini nagkauyon nga ang problema mao ang jobs and skills mismatch tungod kay matud pa nila ang college diploma wala magpasabot nga job-ready na. Mao ni ang rason nganong namugna ang K to 12 Basic Education Program.

Gipanghambog sa gobyerno nga pwede na nga madawat og trabaho ang mga mogradwar sa K to 12. Niadtong Abril tuig 2018 migradwar ang unang batch sa K to 12 Basic Education Program o Senior High School. Kumusta man, nakatrabaho na ba sila? Andam na ba gyod sila sa ilang sudlan nga trabaho? (Sumpayan pa)