Debate
LINTUNGANAY - Fred Languido (Banat) - April 7, 2019 - 12:00am

Gitakda na sa Integrated Bar of the Philippines karong Abril 22 ang debate tali nilang Mayor Tomas Osmeña ug Bise Mayor Edgardo Labella.

Ang panagharong himuon didto sa  City Sports Club. Ang duha kandidato pagkamayor sa Dakbayan sa Sugbo alang sa eleksiyon karong Mayo.

Apil unta sa gihagit sa IBP ang ilang mga runningmate nga sila si Konsehal Mary Ann delos Santos ug kanhi mayor Michael Rama. Apan wala modawat si Rama sa hagit tungod kay alang niya way rason nga makig-debate.

Nangangkon si Rama nga naglawig siya sa survey ug kumpiyansa siyang modaog batok sa iyang kaatbang busa way rason aron siya makiglantugi.

Nakat-on si Rama niini sa iyang kanhi mentor nga si Osmeña. Kining rason ni Rama mao ni gitudlo ni Osmeña niadto sa iyang mga kauban sa politika. Ang pagbalibad ni Rama sa hagit sa debate nagpasabot nga gipuy-an niya ang leksiyon nga nakat-onan gikan ni Osmeña.

Sa pikas bahin si Osmeña maoy desidido kaayo nga makig-debate batok ni Labella.

Gani dugay na siyang nanghagit bisan kaniadto nga wala pa ang IBP-Cebu City Chapter mopasiugda niini.

Nagpasabot ba ni nga nahulga si Osmeña sa iyang kaatbang? Giangkon ni Osmeña nga iyang gitudloan niadto ang iyang mga kaalyado nga dili makig-debate kun  nag-una sa survey.

Apan matud niya nga lahi ang iyang motivation karon hinungdan nga gusto siya og debate.

Nangangkon si Osmeña nga nag-una siya sa survey batok ni Labella.

Apan bisan niini gusto niya nga ikaharong ang iyang kontra sa usa ka debate sa tumong nga makakuha og audience aron ibulgar ang matud pa anomaliya sa miaging administrasyon.

Tinuod man o dili ang ilang mga pangangkon ang bisan unsang matang sa debate importante ug makatabang sa publiko aron masayod ug magiyahan sa ilang pagpili.

Dili ang mga maayong laki sa debate maoy modaog niining ilang umaabot nga panagharong kun dili ang publiko maoy tinuod nga magmadaogon.

Sa pagbalibad ni Rama sama ra nga iyang giayran ang publiko.

Gihikawan niya ang katawhan nga masayod kun takos ba siya nga hatagan sa laing kahigayonan nga moserbisyo sa mga taga-dakbayan sa Sugbo.

DEBATE
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with