Manny di modili, Floyd Jr. sige’g dili

Ang hari maoy giilang kinahawran sa iyang gingharian. Kay sa wala pa siya mahimong hari, sa makadaghang higayon, nakig-away man siya sa mga ngilngig manggugubat, diin siya gyoy midaog sa panggubatan. Busa, giyukboan ug gitahod sa iyang mga sumosunod.

Sa kalibotan sa pamoksing, kining tanan giagian ni Senador Manny Pacquiao sa wala pa siya mahimong Eighth Division World Boxing Champion (diin hangtod karon wala pay nakabuak sa iyang record) ug niining bag-o maoy nagpabiling hari sa WBA welterweight division human pildeha ang batan-ong Adrien Broner, kinsa angay’ng magpasalamat nga wala na sa iyang peak time si Manny, mao nga igo lang si Broner mibarag ug na-knock down kaduha sa kanbas.

Sa nakasunod sa tanang away ni Manny gikan niadtong pagsilang sa iyang ngalan sa nataran sa pamoksing hangtod ning higayon nga milapas na ang kainit sa iyang kaudtohon, ang Pambansang Kamao maoy giilang hari sa matag kasingkasing sa minilyong boxing fans sa tibuok kalibotan.

Si Floyd Mayweather Jr.? Ay, layo ra kaayo!

Niini lang bag-o, human si IBF Welterweight Champion Eroll Spence Jr. milampos pagdepensa sa iyang bakos pinaagi sa unanimous decision nga kadaogan batok sa wala poy pildeng boksidor, Mikey Garcia, diin ilang away didto gipahigayon sa AT&T Stadium, Arlington, Texas, mapagarbohon kaayong mihagad si Eroll ni Manny nga kini maoy gusto niyang sunod ikaharong ibabaw sa ring, haskang dalia nakatubag ni Manny: “Why not? We will give the fans a good fight!”

Mo’nay klarong hari sa kalibotan sa pamoksing. Walay kulba. Bisag batan-on pa ang mihagad, 25 ka payt nga walay pilde, diin kadaghanan knock-out, wala gyud balibari ni Manny.

Pero si Floyd Jr., dihang gihagad ni Manny nga mag-rematch sila human pildeha si Adrien Broner niadtong usa ka impresibo kaayong aksiyon nga gipakitang Pacman didto sa Las Vegas, Nevada, haskang kuyosang Floyd. Naamang, uy! Hasta trash talks, nawala!

Mao ni ang kalainan nilang duha. Si Manny di gyud modili. Samtang si Floyd, sige lag dili. Hinungdan, nga bisag wala gyud kaagig pilde si Floyd sa pamoksing, nahimong walay bili ang maong rekord.

Kay ang kabug-at sa respeto sa minilyong boxing fans, atua man ibuhos tanan ngadtong Manny.