Nagsumpaki
LINTUNGANAY - Fred Languido (Banat) - April 4, 2019 - 12:00am

Ang director sa forensics laboratory sa Public Attorney’s Office nga si Dr. Erwin Erfe mitug-an nga basi sa iyang pakisusi gilugos ang 16-anyos nga si Christine Lee Silawan sa wala pa kini patya ug ilabay sa bakanteng lote didto sa dakbayan sa Lapu-Lapu niadtong Marso 11.

Ang report ni Erfe sukwahi sa PNP Crime Laboratory dinhi sa Central Visayas nga nagkanayon nga way pagpanglugos nga nahitabo ngadto sa biktima.

Si Dr. Benjamin Lara sa PNP Crime Laboratory unang miingon nga way pagpanglugos nga nahitabo.

Laing nadiskub-rehan sa PAO expert nga wala maapil sa report ni Lara mao ang giingong pagsablig og asido sa dagway sa biktima.

Si Erfe mihimo sa autopsy sa patay’ng lawas ni Silawan usa ka adlaw sa wala pa siya ilubong nunot sa hangyo sa mga ginikanan.

Wala motuo ang kabanayan sa biktima nga way pagpanglugos nga nahitabo.

Matud ni Erfe nga dunay mga timailhan sa mga bun-og diha sa kinatawo sa biktima timaan nga siya gilugos. Nagkanayon si Erfe nga posible nga kini gihimo sa sobra sa usa ka tawo.

Ang report sa PAO nakahatag og kalibog sa publiko, ug tingali, mismo sa mga hingtungdan. Kinsa may husto nila ni Erfe ug Lara?

Si Lara dihang gi-interview sa mga reporters kagahapon nagdumili pa paghatag og kumentaryo sa nahimong findings sa PAO.

Matud niya nga kinahanglan pa siya og pagtugot gikan sa ilang ulohang buhatan sa dili pa siya moluwat og pamahayag.

Naguol ko sa posibling mamahimong epekto niini sa kaso nga gisang-at sa National Bureau of Investigation batok sa 17-anyos nga kanhi uyab sa biktima.

Unsaon pagkombinsir sa mga awtoridad ang piskal nga nag-imbistigar sa kaso nga ang suspetsado maoy naghimo sa krimen kun ang ilang resulta sa ilang autopsy gisukwahi sa PAO? Kun makalusot man sa piskaliya, ang labing dako nga hagit nga ilang atubangon mao ang pagprobar sa krimin didto sa hukmanan.

Nabalaka ko nga mahikawan sa hustisya ang pamilya sa biktima nunot sa nagkasumpaki nga resulta sa autopsy.

Mao ni sagad mahitabo kon daghan ang mopapel sa imbistigasyon.  Hinaot magkasabot ang PAO ug ang PNP Crime Lab ug ipasabot sa publiko ang nagsumpaki nila nga report.

CHRISTINE LEE SILAWAN
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with