Death threats di maayong ipasangil ngadtong Duterte
Samtang buhi pa ang tawo, lisod kaayo malikayan ang pagpakasala. Tiaw bay, ultimo diha sa paghinulsol sa atong mga sala, pirme gyud kining litokon sa pari ug manimbahay panahon sa misa:
“Nagakompisal ako sa Diyos nga makagagahom sa tanan ug kaninyo, mga igsuon, nga nakalapas ako og dako uyamot sa hunahuna, sa pulong ug sa buhat ug sa wala pagbuhat sa kinahanglang buhaton…”
Kini nagmatuod, nga hasta pari, kinsa tawo lamang, makasala sab. Mao nga agi’g andam sa matag kaugalingon sa ipahigayong Santos nga Misa, kinahanglang hugasan gyod ang tagsatagsa nato ka nagkahugaw’ng kalag pinaagi sa maong pangadyi-paghinulsol.
Nga sa ato pa, dili lang diay kita kutob sa unsay atong gipamulong ug ginabuhat ngadto sa atong isi’g ka tawo nga kita makasala, kondili, sa unsa pod diay ang anaa sa atong hunahuna.
Sama niining gihimo sa tulo ka pari, nilang Fathers Robert Reyes, Flavie Villanueva ug Albert Alejo, kinsa kay pulos nakadawat og death threats pinaagi sa text messages sa selpon, ang tanang pasangil sa hinungdan didto nila ibundak ni Presidente Rodrigo Roa Duterte.
Matud pang Reyes, ay: “Igo lang ming mipagawas sa among baroganan. Wala mi mahadlok nimo, Digong. Igo ra ming misunod sa among Ginoo.” Mipuno si Reyes, nga ang bahad (threats), insulto, pamalikas-tunglo (curses) batok sa Simbahang Katoliko nagagikan kuno sa hait nga dila ni Duterte.
Sa ihap ni Reyes, miabot na kunog 26 ka higayon ang pagpanginsulto ni Duterte ngadto sa Simbahan, sa mga alagad niini ug lakip na ngadtong Pope Francis.
Wala kaha makasala si Reyes ning iyang pamasangil? Giunsa niya pagkasiguro nga Duterte supporters ang mipadala nila’g death threats? May ngalan ba ang tag-iya sa selpon ug mipaila ni Reyes nga kini gisugo ni Duterte nga baharang patyon silang tulong pari?
Duna bay nahuptang ebidensiya si Reyes nga magtumbok-tug-an nga ang gisulti niya tinuod? Or, kining pasangila namugna lang gumikan sa daotan niyang hunahuna?
Father, basin bayag ang mibuhat ining death threats, mga anti-Duterte ra diay, kinsa sa hilom mogamit pud sa simbahan aron paglumpag sa iyang administrasiyon? Usab ang paghunahunag daotan, usa ka dakong sala.
Busa, di gyud maayo nga mamasangil kang Duterte.
- Latest