Kampanya

Pormal na nga nagsugod ang kampanya sa lokal nga mga kandidato niadtong Biyernes, kini basi sa kalendaryo sa Commission on Elections kon Comelec.

Apan sayud ang tanan, dugay rang nagsugod pagpangampanya ang mga kandidato.

Bisan gani ang pagbutang sa mga campaign posters dugay ra nilang gisugdan.  Ang Comelec miingon di nila magukod ang mga kandidato sa paglapas sa lagda hangtud magsugod ang kampanya tungod kay di pa kuno maisip nga early campaigning kon sayo nga pagpangampanya ang ilang gihimo hangtud nga magsugod na ang campaign period.

Apan klaro ni nga palusot sa Comelec. Ang tinuod di sila interesado ug seryoso nga mopatuman sa lagda gawas lang og duna gyuy mangusog sa pagreklamo.

Ang problema kay way usa nga moreklamo tungod kay ang tanang kandidato pulos nakalapas sa lagda. Sa laktud way bisan usa nila nga makapangangkong santos ug way buling sa paglapas sa mga lagda.

Kini maoy hinungdan nga bisan klaro kaayo ang kalapasan sa kampanya inutil ang Comelec paggukod nila.

Ang angayang buhaton sa Comelec mao ang pagpapas nalang sa lagda nga way kapuslanan.

* * *

Miinit og samot ang kumbati sa trolls sa mga kandidato diha sa social media.

Nag-iyahay og pasangil sa di maayong binuhatan sa mga kandidato. Ang uban sa mga pasangil maisip na gani nga paglapas sa cyber libel.

Pananglitan ang mga memes nga namasangil sa usa ka kandidato nga “kawatan.”

Tinuod ang ubang mga kandidato dunay giatubang nga kaso. Apan kini nagpabilin pa nga pasangil ug wala pa kapamatud-i sa hukmanan.

Ang pagtugot nila sa Comelec nga makapadayon sa ilang kandidatura pruweba nga sila di pa konbiktado ug nagpabiling inosente sa pasangil.

Ang kataw-anan kay ang ubang mga kandidato nga namasangil sa ilang kontra nga kawatan utro pud nga kiriwan.

Di garantiya nga walay kaso nga giatubang ang kandidato aron siya makapangangkong di kawatan. Ang uban nila nakasikit lang sa miaging administrasyon hinungdan nga wala maapil sa mga kaso.

Mas angayang bantayan sa publiko ang mga kandidato nga nagtakuban sa pagkakarnero tungod kay mas dako ni kun mangawat.

Atong hinumduman way mekaniko nga wala magkabuling, ang tanan pulos gyud dunay asite ang kamot.

* * *

Akong kinasingkasing nga pasalamat sa tanang miduyog sa among pamilya sa miaging usa ka semana sa pagbangutan tungod sa pagtaliwan ni Mama Linda.

Daghan kaayong salamat gikan sa tibuok namong pamilya ug kabanayan.