Gi-ayran
LINTUNGANAY - Fred Languido (Banat) - March 28, 2019 - 12:00am

Duha ka higayon na nga niduaw sa Sugbo ang grupo sa “Otso Diretso” aron sa pagpangampanya.

Sa unang higayon giubanan sila ni Bise Presidente Leni Robredo ug niadtong Martes si kanhi presidente Noynoy Aquino maoy mikuyog nila.

Apan sa duha ka mga higayon nga dinhi sila aron sa pagpangampanya daw sa way bisan usa ka lokal nga mga opisyal ang mipaduol nila.

Bisan ang kanhi mga kaalyado sa Liberal Party nga labihan ka mga puderoso atol sa administrasyon ni Aquino wala na mopatim-aw.

Gilikayan ug gi-ayran sila nga daw sa may sakit nga mananakod. Kon unsa ka sipsip sila kaniadto ni Aquino ingon sab sila niana ka bugnaw karon ngadto sa kanhi presidente.

Di gyud malikayan nga makapangutana ang katawhan, labi pa kadtong mga nagsunod sa dagan sa politika sa Sugbo, hain naman ang mga kaalyado ni Aquino kaniadto?

Dili ba labihan man nilang daghana niadto? Nganong wala man igkita sila si Gov. Hilario Davide III ug Bise Gobernador Agnes Magpale?

Ang nakaalegre mao nga samtang sila si Davide ug Magpale daw midistansiya ni Aquino, labihan nilang pamugos nga makig-alyansa sa grupo ni Davao City Mayor Sara Duterte.

Diha na gud untay mga tarpaulin si Magpale nga giisa ang iyang kamot ni Sara.

Apan napawong ang ilang paninguha nga makasakay sa popularidad ni Presidente Rodrigo Duterte pinaagi sa anak niini human sa pormal nga panag-alyansa sa One Cebu ug Hugpong ng Pagbabago.

Napuhalan sab ang unang pag-isa sa kamot ni Magpale ni Sara tungod kay atol sa dakong kalihukan sa HNP niadtong miaging semana didto sa Liloan gituboy ni Sara si Kongresista Gwen Garcia.

Gisungog sab sa kahigayonan si Magpale tungod kay ang iya untang gisaligan nga makapatong siya sa entablado uban ni Sara nga si Mandaue City Mayor Luigi Quisumbing giingong napugos pagbalibad niya.

Sigun sa akong tinubdan wala mosugot si Sara nga mopatong uban nila sa stage si Magpale didto sa Mandaue maong napugos si Quisumbing pagbalibad.

Nangatarongan nalang kuno si Quisumbing nga ang Davao maoy nagbuot kinsay imbitaron.

Ang nakaalegre kay naimbitar na kuno ni Magpale ang iyang mga kaalyado nga motambong sila sa kalihukan sa Mandaue kay nagpaabot siya nga iisa ni Sara ang iyang kamot.

Ang resulta naingon sila og kiko didto sa kalihukan nga wala man lang gani i-acknowledge ang ilang presensiya.

Kun mao ni ang nahitabo, dad-on pa kaha ni Quisumbing si Magpale ug Davide diha sa Mandaue kon mandoan sila ni Sara nga paluyohan ang kandidatura sa ilang kaalyado nga si Garcia?

Magkatawa si Garcia niining maong sitwasyon tungod kay posibling ang duha ka kandidato pagkamayor sa Mandaue maoy mosuporta niya.

 

GI-AYRAN
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with