Ang estado sa druga sa dakbayan

Duha na lang ka barangay sa dakbayan sa Sugbo ang seryoso nga apektado sa suliran sa gidili nga drugas. Mao kini ang gitug-an ni Gary Lao, ang executive director sa Cebu City Office for Substance Abuse Prevention o (COSAP) dihang ako nga nahinabi sa GERRY AUXILIO LIVE ON FACEBOOK kaniadtong Domingo sa udto.

Si Lao mitug-an nga wala gayoy barangay sa dakbayan sa Sugbo nga drug-free.

Buot ipasabot, ang 80 ka barangay sa dakbayan sa Sugbo pulos gayod apektado sa suliran sa gidili nga drugas.

Sigun sa datus nga gihatag ni Lao nga iya usab nga  gibasi sa datus nga gihatag sa kapolisan sa dakbayan sa Sugbo niining buwan sa Marso 2019, sa 80 ka mga barangay, 14 ang slightly affected, 64 ang moderately affected ug duha ang seriously affected.

Hinuon wala gitug-an ni Lao kon unsa ang mga barangay nga nahimutang sa nahisgotang mga kategoriya.

Anaa lang pod sa siyam ka libo ang mga adik sa dakbayan  sa Sugbo kun ibasi kini sa mga mitahan sa ilang kaugalingon sa kapolisan niadtong tuig 2016.

Kun ang maong datus ang atong basihan, maingon nato nga nahimo nang epektibo ang kampanya sa gidili nga drugas sa dakbayan sa Sugbo tungod kay duha naman lang ka barangay ang seryosong naapektohan sa gidili nga drugas.

Sukwahi kini sa kaniadto nga anaa kini sa lima nga gilangkoban sa gitawag og PDEAP - Pasil, Duljo, Ermita, A. Lopez ug Pulang Bato.

Hinuon dili kaayo ta makatuo nga siyam kalibo lamang ang gidaghanon sa mga adik sa dakbayan sa Sugbo tungod kay sayod ta nga adunay daghang adik nga wala motahan sa ilang kaugalingon ngadto sa kapolisan niadtong tuig 2016.

Apan 2019 na kita karon, manghinaut lang ko nga miubos na pod unta ang ilang gidaghanon.