Panaw padulong sa gihikogan

May gidalit nga yuta ang mga manggihatagong banay nga Aranco.

Kini ang yuta nga pagahimoong minteryo sa parokya ni San Pedro Calungsod.

Sa maong yuta naghikog kanhi ang usa ka tawo. Problema ang hinungdan kun nganong siya naghikog. Buot siyang mopahulay na lang gikan sa mga suliran nga alang tingali niya walay sulbad.

Medyo taas ang among panaw padulong didto.

Kay wala pa may dalan mao nga amo kining gibaktas.

Kapoy man tuod ug kutas apan nigawas ang singot nga tingali makapahilis sa tambok nang tiyan.

Pag-abot didto nakita ko ang daghang mga kahoy ug nadungog ko ang mga tingog sa langgam nga maawiton.

Sa akong tan-aw nindot tuod pahuwayan ang maong dapit labina kay kini halayo sa kadaghanan. Walay disturbo, walay kisaw.

Ang kinabuhi usahay sa tawo nahimong puno kaayo sa mga butang nga wala kinahanglana.

Busy kita alang sa atong kaugmaon bisan dili pa nato matino kun maugmaan ba gyud kita.

Ang mahinungdanon mao nga buhat lang og maayo, panghatag sa imong panahon, ug paghunahuna og maayo alang sa tanan.

Ang dapit nga gihikogan nga puhon mahimong sam-ang sa motaliwan natong kaigsuonan ang nahimong kalipay ug tapokanan sa mga buhing kapamilya ug kapuso.

Ning paagiha makita nato nga human diay sa kamatayon anaa ang kinabuhi ug ang inspirasyong makapabuhi sa matag usa kanato.