EDITORYAL - Plaka ipaagi sa sabotsabot

Minilyon ka mga motorcycle riders sa tibuok Pilipinas ang nagpahigayon og lihok protesta batok sa pagbutang og double plates sa mga motorsiklo subay sa pagpatuman sa Motorcycle Crime Prevention Act (Republic Act 11235).

Ang maong lihok protesta gibansagan nga unity ride sa nagkadaiyang mga organisasyon sa mga motor riders dili lang sa Metro Manila kondili lukop nasud gumikan sa giingong peligrong nagpaabot kanila kun pabutangan og plaka ang atubangan nga bahin sa motorsiklo.

Dinhi sa Sugbo, liboan sab ka mga motor riders ang niduyog sa maong kalihokan agi og pakighiusa ngadto sa ubang mga motor riders sa tibuok nasud.

Ang maong balaod nga napirmahan ni Presidente Duterte kinsa nailhan sab nga usa ka motor rider, gihimo aron makatabang sa law enforcement units kontra krimen nga binuhatan sa mga riding in tandem.

Gimando sa maong balaod nga ang plakang ibutang kinahanglan mabasahan gikan sa 15 metros nga distansya ug may kaugalingong color coding ang matag rehiyon.

Pinaagi niini mas mapadali ang pagsulbad sa mga krimen nga sagad binuhatan sa mga magsakay og motorsiklo.

Samtang ang rason sa mga nagprotesta, peligro kaayo kun butangan og dakong plaka ang atubangan sa motor tungod kay makausab kini sa hapak sa kasugat nga hangin ug posibleng madisgrasya ang rider o ba kaha tungod sa kalapad sa plaka malagpot kini ug makaigo og ubang motorista. Dili imposible nga mahitabo ang maong mga senaryo nga gilatag sa mga nagprotesta, apan dili solusyon ang dili na pagbutang niining duha ka mga plaka.

Mas labing maayo nga magsabot ang mga hugpong sa mga motor riders sa Land Transportation Office ug sabotan ang opisyal nga gidak-on sa plaka o decals nalang ba kaha ang ibutang sa atubangan.

Ning paagiha, may kapuslanan ang pagbutang niini alang sa mga law enforcers ug luwas sab gikan sa peligro ang mga motor riders.