Dili P50 ang pagbaligya uy

May nangutana nako nga taga Mandaue City kun tinuod ba kuno nga si Kongresista Jonas Cortes mibaligya og yuta sa siyudad kaniadto dihang mayor pa siya unya ang presyo tag P50 ra ang kada metro kwadrado.

Tingali ang sender nakabasa nga usahay mohisgot ko og isyu sa Mandaue. Lakturon lang nako ang pag-ingon nga ang giingong pagbaligya og yuta atol sa termino pagka mayor ni Cortes tinuod, apan ang presyo dili kay P50 kada metro kwadrado.

Ang 35,851 square meters nga foreshore lands nga kabakhawan pa kaniadto, gi-assess lang kini sa kantidad nga P1.6 milyones niadtong 1978, ug dihang giabangan kini sa ECODEMCOR, gi-develop nila ang property ug migasto ang kompaniya og kapin sa P75 milyones.

Dayon, mitanyag ang ECODEMCOR sa Mandaue nga paliton na lang nila ang yuta base sa kantidad kaniadto nga bakhawan pa ni, ug mohatag sab sila og lapad nilang yuta nga magamit sa siyudad isip karsada.

Kun paliton sab ang yuta nga iya sa ECODEMCOR nga gihatag sa Mandaue isip dugang bayad, nagkantidad usab kini og minilyon ka pesos. Mao kini ang isyu nga wala iapil pagsulti sa mga nanaway kang Cortes. Suhito ko niini kay nagbasa ko kanunay sa mga report The Freeman ug sa laing pamantalaan. Sa laktud, dili gyud tinuod nga tag P50 ra ang pagbaligya sa yuta kay nihatag pa man og laing property ang ECODEMCOR ngadto sa kagamhanan sa Mandaue. Unta nakahatag ko og tubag.

* * *

Akong nasuta nga wala mamakak si Konsehal Mary Ann delos Santos sa iyang gitug-an nga nagsugod na sa pagpamintal ang kontraktor sa bag-ong Cebu City Medical Center (CCMC) building.

Gusto gyud unta ko nga mobisita sa nagpadayong pagtrabaho sa hospital building, apan na-busy tingali si Konsehal Delos Santos ug wala na makatubag nako, mao nga hilom na lang ko nga miadto ug nakita gyud nako ang nagpadayong pagpamintal.

Kinahanglan gyud nga bantayan nato kanunay ang kalamboan sa pagtukod sa bag-ong CCMC aron nga ang kontraktor, dili magtinapolan ug paspasan nila ang ilang trabaho.

* * *

Nakabantay ko nga ang pagsikat ni Niña Mabatid isip kandidato pagka konsehal sa north district tungod sa iyang mga proyekto ngadto sa katawhan, gawas sa ordinaryo nga pagpangampanya, nakaani og selos sa usa niya ka kauban.

Kuhai ra gud og pagtulon-an ang silhig nga kun tibuok grupo magkahiusa, lig-on gyud, apan kun mag-awayay tungod sa selos, aw ang maani mao ra gyud ang kapildehan.