Kuwartang P2 million, o hustisya?

Init ang kuwarta. Gani, mao man kini ang hinungdan nganong daghang politiko ug military, opisyal man o dili, ang nahimong drug protector, o misulod niining matanga sa pangita nga ang kadali ra gyod makapatukod og luhong mga balay ug makapalit og mahalong brand new cars, kay daw namunit man lang silag minilyon nga salapi sa karsada.

Hayahay kaayo ang mga drug lord. Sila maoy milawog og dinagkong kantidad, dili lang kutob sa mga mayor, kondili, lakip na sa mga heneral. Resulta, sila ang gipaka-Ginoo niining mga narco-politicians nga anaa sa listahan nga gigunitan ni Presidente Rodrigo Roa Duterte.

Gumikan ning illegal drugs nga maoy mihari sa atong nasod karon, nagkalainlain lang ang matang sa dugoong krimen nga mobanaw sa kadalanan o kasagbotan halos matag adlaw. Adunay mga dalaga nga gisignit sa grupo sa mga sabog lalaki, gilugos ug human matagbaw sa ilang kaulag, gipatay.

Sama sa nahitabo ni anhing Christine Lee Silawan, 16 anyos, church collector, kinsa nahiagom sa linuog nga paagi sa kamatayon niadtong Marso 10.

Misiyagit og hustisya ang pamilyang nagbangutan. Miabot P2M ang reward gikan sa gisakitang sibilyan ug gobiyerno.

Tuod man, milihok gilayon ang kapolisan. Duha dayoy gidakop. Ang usa, si Jonas Bueno nga didto nila sikopa sa Davao City, diin ultimong ordinariyong tawo, dili gyud motuo nga siya ang tagsala. Sanglit ang krimen, sa Lapu-Lapu City nahitabo ug nganong atua man sa Davao City ang dakpon?

Ikaduha, mao ang uyab kanhi ni Christine, kinsa menor de edad sab. Matod pa, tungod sa mga bug-at nga ebidensiya nga nakuha sa kapolisan, giakusahan nilang prime suspect ang maong ex-boyfriend, kinsa wa gyud moangkon.

Usab, may netizens nakamatikod, nga ang gisul-ob kunong sinina ni Christine dihang nagkuyog silag iyang ex-boyfriend base sa CCTV footage, dili kuno pareha sa sinina nga nakita didto sa crime scene.

Busa, sila nahadlok basig dili ang tinuod nga mamumuno maoy masilotan. Naobserbaran man gud sa mga tigpaniid. Nga, kun ang kriminal walay gipatong sa ulo nga dakong reward, di gyud madakpan. Pero’g minilyon na ang kantidad, dali rang makasignit ang kapolisan.

Mao, nga daghan ang nangutana: “Unsa bay importante sa mga mananakop, ang P2M reward, o hustisya?