EDITORYAL - Maoy nakat-onan

Nahimo karong sumsoman sa mga estudyante ilabi na sa social media ang giingong pagpangisog ug kasuko ni senatorial candidate Larry Gadon ngadto sa usa  ka estudyante sa University of San Carlos (USC) atol sa senatorial candidates forum.

Si Gadon kinsa nahimo nang kontrobersiyal kaniadto tungod gihapon sa pagbanghag sa mga nagprotesta didto sa kaulohan, nangambisyong mahimong senador ug ang pagtambong sa maong kalihokan higayon unta niyang makahaylo og botante.

Matud pa niya didto sa forum, nga sa panahon ni diktador Ferdinand Marcos walay nahitabong kurapsyon ug daghang mga proyekto nga nahimo itandi sa nipuli nga administrasyong Aquino. Samtang tuod sayop ang pamaagi sa maong estudyante sa pagpadayag sa iyang habig, apan tingali mao lang kadto iyang nahunahunaang paagi.

Nagpakita kadto nga ang maong estudyante naminaw gyud sa gipanulti ni Gadon sa mikropono. Apan wala motakdo ang pamahayag ni Gadon sa kung unsay nahasulat sa kasaysayan nga nakat-onan sa klase sa maong tinun-an. Sa habig sab ni Gadon, natural lang nga pulos mga maayo lamang bahin sa mga Marcos ang iyang ipanulti kay sakop man siya sa partido sa kanhi diktador, ang Kilusang Bagong Lipunan (KBL).

Matud pa nga gitawag dayon ni Gadon ang atensyon sa organizers sa maong forum ug gimandoan sila nga pagawson sa venue ang maong tinun-an.

Apan wala kini mahitabo ilabi na nga ang ubang mga kandidato pagka-senador nga nitambong nipasabot kang Gadon nga palabyon nalang ug hatagan nalang og warning sa organizers ang tinun-an aron di na mousab.

Nakalimot tingali si Gadon nga imbitado ra siya sa organizers. Wa siya’y katungod nga mandoan ang organizers ug hulgaon nga kun di pagawson ang estudyante siya maoy mo-walk out. Dunay panultihon nga kadto lamang mga mananaog maoy mosuwat sa kasaysayan. Sa kasaysayan sa Pilipinas dili si Marcos ang mananaog kay gisipa man siya pagawas sa mga tawo bisan pa og tinuod ang uban sa gipanulti ni Gadon.