Lalawigan sa Sugbo gipasidunggan sa PhilHealth

Subay ug nunot sa pagkahimo nang balaud sa Universal Health Care Act of 2019 (UHC), ang PhilHealth magpasiugda’g mga kalihokan isip pagpatuman sa UHC.

Usa niini mao ang pagpahigayon sa Health Care Financing Summit uban sa tema: “Multiple Lenses, One Collective Stand on Health Financing: A Framework for Action.” Usa kini ka mahinungdanong elemento pagpatuman sa UHC.

Usa sa mga highlight niining maong Summit mao ang pagpasidungog sa mga individual ug mga grupo nga misalig sa PhilHealth ug mitunol sa ilang tabang alang sa epektibong pagpatuman sa National Health Insurance Program.

Sa iyang suwat ngadto kang Gobernador JunJun Davide , si Dr. Francisco  Z. Soria, Jr. Vice President sa PhilHealth ug sakop sa Management Group, iyang gidapit si Davide pagpatambong sa Stakeholder Recognition Night aron pagdawat sa Plaque of Recognition” for being the second highest number of enrolment with no arrears and on time payment from CY 2016-2018 under the Sponsored Program.

Daku kining dungog alang sa lalawigan sa Sugbo. Tiaw moy ikaduha kita sa tibuok nasud sa labing daghan nga enrolment, walay utang ug up-to-date ang pagbayad gikan sa 2016 hangtud 2018.

Gumikan sa nag-una nga commitment ni Davide, si Dr. Rene Catan, ang provincial health officer, maoy midawat sa plaque of recognition in behalf sa Gobernador ug sa lalawigan sa Sugbo. Didto kini himoa sa Grand Ballroom, Crowne Plaza Manila Galleria sa Quezon City.

Sa akong nasayran, paglingkod sa present administration sa Kapitolyo sa tuig 2013 ang accumulated nga arrears o bayranan sa lalawigan ngadto sa PhilHealth mikabat og kapin sa P90 milyones.

Gihinayhinayan kini pagbayad sa atong lalawigan hangtud nga naimpas ug na-on time na ang pagbayad sa lalawigan.

Ug unsa man ning Universal Health Care Act (UHC)? Unsa may mga kaayohan nga ikadalit niini ngadto sa panglawas sa naghuot nga katawhan sa nasud?

Katin-awan ni Dr. Catan: “To me, the UHC is like a road map. It is essentially using robust healthcare money  to finance change in the system from a highly curative, hospital and specialist approach, to a preventive, community based and primary care approach.”

So, atong mapaabot nga sa hingpit nga pagpatuman unya sa UHC, ang kausaban unya sa atong sistema pag-deliver sa mga health services ngadto sa katawhan,  gikan sa pagpanambal pag-ayo sa sakit, ngadto sa paglikay nga masakit. Sa ato pa, from curative ngadto sa preventive.

Unsaon man ni? Padayon ni Dr. Catan: “ The law says we use healthcare money to redistribute health services to the rural areas through  schemes and incentives to be developed by the DOH and PhilHealth.”

Nindot ni kay sa paglikay nga masakit, i-involved na ang katawhan, ang katilingban, ug ang mga serbisyo sa panglawas ipadangat na ngadto sa kahilitan nga dapit ...  sa mga rural areas, sukwahi sa atong naandan nga ang mga health services gi-concentrate lamang sa mga tambalanan sa poblasyon ug sa sentro sa populasyon.

Matud pa, you need not be rich to be healthy. Ato kining makab-ot ug matagamtaman pinaagi unya sa Universal Health Care Act.