Mike Rama out, Vicente Loot ug Fralz Sabalones in

Miabot sa dunggan ang ngisi ni kanhi mayor Mike Rama human mawagtang ang iyang pangalan sa listahan ni Presidente Rodrigo Roa Duterte sa mga politiko nga nalambigit sa ginadili nga drugas.

Una nang giisa kauban ni Bise Mayor Edgardo Labella ang kamot ni Mike ni Duterte isip kandidato sa iyang partido sa pagka Mayor ug Bise Mayor sa Dakbayan sa Sugbo.

Ang pagwagtang sa pangalan ni Rama sa listahan sa mga nalambigit sa ginadili nga drugas nagsilbing imprimator ug pagtuldok sa mga pagduda ug pasangil sa iyang pagkalambigit sa ginadili nga drugas.

Ang buot ipasabot niini, gilimpyohan ug gibakwi na sa presidente ang paglakip niya ni Rama sa mga drug protectors.

Ang pagwagtang sa pangalan ni  Rama sa listahan sa mga nalambigit sa ginadili nga drugas pag alkontra kini sa pamahayag sa tigpamaba sa Malakanyang Atty. Salvador Panelo.

Si Panelo miingon nga ang pagisa ni Duterte sa kamot ni Rama isip kandidato sa pagka Bise Mayor sa iyang partido PDP Laban usa lamang ka pagrespeto ni Rama kinsa mitambong sa proklamasyon sa mga kandidato sa partido dinhi sa Sugbo.

Nagbunga ra gayud ang mga pagpaningkamot ni kanhi Rama nga malimpyohan ang iyang pangalan nga naapil sa listahan sa mga nalambigit sa ginadili nga drugas.

Sugod sa mga panahon nga dili siya gustong atubangon sa presidente hangtod sa mga panahon nga kini mabuntagan sa pagpinaabot sa presidente nga gusto niyang pangutan-on unsang pagkahitaboa nga naapil man siya sa mga drug protector, si Mike wala gayod molugak.

Hinuon makita usab nato sa lihok ni Duterte nga dili kaayo siya kombinsido sa pagkalakip sa pangalan ni Mike Rama sa iyang listahan tungod kay sa dihang nabakanti og gamay  ang iyang oras nakigatubang man siya ni Mike ug nagpahulagway pa.

Dili pareha sa uban nga naa sa iyang listahan nga iya gayong gikastigo ug wala atubanga.

Pero samtang giwagtang ang pangalan ni Mike, nagpabilin sa listahan si Daanbantayan Mayor Vicente Loot ug karon giapil sab si San Fernando si Vice Mayor Fralz Sabalones sa listahan sa mga nalambigit sa ginadili nga drugas.

Congratulations Mayor Mike.