EDITORYAL - Pananom og kahoy

Nagnihit na sab ang supply sa tubig karong mga panahona nunot sa nasinating El Niño nga kadungan sab sa ting-init karon sa nasud.

Ang Metro Manila hinayhinay ng nakabatyag sa epekto huwaw ug gani hasta ang Malacañang mimando na sa mga hingtungdang ahensya nga buhaton ang tanan aron di magkalisod ang katawhan sa tubig.

Dinhi sa Sugbo, may mga higayon ng way agas sa tubig sa pipila ka mga dapit nga giserbisyohan sa lokal nga water district. Matud pa nga nihit gyud ang kakuhaan og tubig karon.

Kaning problemaha dili ni mahitabo kun kaniadto pa giatiman ang kabukiran sa Sugbu.  Karon, pila nalang ka ektarya ang matawag nga kalasangan dinhi sa Sugbo nga tinubdan sa tubig sa mga kasapaan niini?

Angay tingaling mag-estrikto pa gyud ang Department of Environment and Natural Resources pagdili sa pagpamutol og kahoy ug seryusohon ang pagpakusog sa pagpananom og mga kahoy.

Ang mga ahensya sa gobiyerno kanunay nalang kutob sa reaksyon sa mga epekto sa problema inay nga malungtarong solusyon aron di na masubli ang suliran.

Labing maayo kun himuong rekisitos sa tanang motapos sa elementary, high school ug kolehiyo ang pagpananom og kahoy sa kabukiran matag tuig hayan pwerte nang labonga karon sa kalasangan sa Sugbu.

Kani maoy usa sa labing epektibong solusyon sa problema sa kanihit sa tubig nga masinati matag tuig.

Gawas nga makapundo og daghang tubig sa mga kasapaan lakip na ang mga dams ug water reservoir ug labaw sa tanan ang ground water ilawom sa yuta.

Gawas pa usab nga makapabugnaw kini sa palibot ang mga kalasangan, makatabang sab kini sa pagpamenus sa polusyon dinhi sa Sugbo nga karon nagdasok na ang mga sakyanang nagbugwak og itom nga aso.

Sa pagkakaron, bugtong mahimo lang sa katawhan ang pagtinihik paggamit sa ilang tubig.