Layo sa tinood

Ang pagkab-ot og hustisya ang gisinggit dili lang sa pamilya sa 16 anyos nga si Christine Lee Silawan kinsa nabiktima sa linoog nga pagpatay kundili sa tanang katawhan nga natandog sa iyang gidangatan.

Busa nakakita og paglaum ang mga tawo sa gihatag nga pagtutok sa mga otoridad sa kaso ilabi na sa hinanaling pagsikop sa mga kriminal.

Niadtong nakalabay’ng Biyernes nadakpan sa hiniusang pwersa sa National Bureau of Investigation, Criminal Investigation Group ug sa Philippine National Police didto sa Davao ang usa ka Jonas Bueno.

Gidakop nila si Bueno gamit ang warrant of arrest sa kasong pagpatay diin gitumbok siya nga sa mipatay sa usa ka maguuma didto sa Dakbayan sa Danao diin ang biktima gipanitan.

Sa press conference sa opisyal sa mga otoridad gilambigit nila si Bueno isip person of interest usab sa kamatayon ni Silawan.

Mas na highlight na hinoon ang Silawan murder sa pagkasikop ni Bueno nga mao nay headline sa balita.

Matud sa mga otoridad didto sa Davao nga tungod kay pareho kuno og estilo ang krimen nga gihimo ni Bueno maong gilambigit kini sa kamatayon sa dalagita.

Apan sa pagkasikop ni Jonas Bueno misamot naman hinoon ka lawgaw ang pagkab-ot sa hustisya sa kamatayon ni Christine.

Gani mismo ang pamilya sa biktima dili kombonsido nga mao kini ang responsable sa kamatayon sa dalagita.

Mao usab kini ang katahap sa uban tungod kay murag layo ra man sa tinood nga si Bueno ang suspek.

Sa pamahayag sa mga otoridad sa Davao duna ka semana na nga atoa sa Davao si Bueno kauban ang iyang asawa ug mga anak.

Giunsa man niya pagpatay sa dalagita nga toa naman siya sa Davao dihang nakaplagang patay si Christine?

Base sa interview sa Mindanao based media sa mga silingan o gipuy-an ni Bueno Pebrero 22 pa kini niabot sa ilang dapit.

Kun tan-awon pobre ug walay ikasarang si Bueno nga dali kaayong makataboktabok og dapit aron makaikyas sa krimen kun siya man ang mipatay ni Christine.

Dako kaayong inhustisya sa biktimang si Christine kun sayop ang tawo nga maduot sa iyang kamatayon.

Magkatawa sa dakong kasaulogan ang tinuod nga kriminal kun ugaling paundayonan sa mga otoridad nga si Bueno ang kriminal sa dalagita.

In fairness sa Cebu based media nga nagsunod sa kaso maampingon kaayo sa pagbalita sa nahitabo, ug in fairness usab sa kapolisan sa Lapu-Lapu City ug sa tibook PRO 7 wala gyud sila mokompirmar sa kalambigitan ni Bueno sa Silawan murder.

Ang media sa Manila ang ni break og una sa litraro ni Bueno nga dunay caption nga maoy suspek sa pagpatay ni Christine.

Seguro nagbase sila sa kasayoran nga gihatag kanila gikan sa ilang source sa Camp Crame.

Isip usa ka tigbalita nga nagsunod sa kaso, dismayado sa kalamboan karon sa nahitabo sa dalagita tungod kay murag layo ra sa tinood ang kalamboan.

Tungod lang ba sa dakong reward money ipamugos gyud ang sayop nga tawo nga maoy suspek sa krimen?

Dili kumo nalambigit si Bueno sa pagpanit og maguuma sa Danao City siya na usab ang mipatay kang Christine.

Kun si kinsa kadtong mihimo sa linoog nga krimen mao gyud  ang angayang dakpon ug pahamtangan og silot aron mahatagan sa tinood nga hustisya ang kamatayon sa biktima.