EDITORYAL - Naibta’g tunok

Subling gipangalanan ni Pres. Rodrigo Duterte ang mga o matud pa narco-politicians sa nasud.

Ikatulo na kini ka higayon nga gibuhat sa pangulo. Apil sa gipanganlan silang Daanbantayan Mayor  Vicente Loot ug San Fernando Vice Mayor Fralz Sabalones, nga igsuon sa self-confessed drug lord nga si Franz Sabalones.

Apan may usa sa mga nalipay nga daw naibta’g tunok,  siya mao si kanhi Cebu City mayor Michael Rama kay wala na siya sa listahan.

Si Rama usa sa mga gipangalanang drug protector sa presidente, gani kaduha gyud ka higayon kini gibaharan sa presidente. Naapektahan og maayo si Rama hasta ang plano niya pagdagan pagbalik sa pagka-mayor.

Naapektahan sab ang iyang pamilya ug bisan gani tingali ang iyang mga supporters nga supporters sab ni Duterte posibleng nitalikod sab niya.

Ang mga supporters ni Duterte kontra gyud sa ilegal nga drugas mao nga posibleng wala sila ganahi ni Rama tungod sa paghingalan kaniya ni Duterte.

Si Rama kusganong nihimakak niini ug nanghangyo nga makaestorya personal ang presidente aron malimpyuhan iyang pangalan, apan pakyas.

Takulahaw lang nga sa nangaging mga buwan ug sa makapila ka higayon nga pagduaw ni Duterte dinhi sa Sugbo, wala na niya hisguti si Rama sa narco-list.

Ang partido ni Rama nga Barug Team Rama nahimo na karong Barug-PDP Laban sa Sugbo, alyado na sa pangulo.

Aduna nay mga higayon nga nakitang gikauban ni Duterte si Rama ug PDP-Laban Cebu City Chapter leader Vice Mayor Edgardo Labella nga modagan pagka-mayor karong eleksyon sa mga kalihokan dinhi.

Giendorsar pa gyud sa presidente ang mga kamot ni Labella ug Rama atol sa proclamation rally sa PDP-Laban senatorial candidates ug local candidates dinhi sa dakbayan sa miaging buwan.

Bisan wala bakwia sa presidente iyang unang pamahayag, kun basehan ang mga lihok ug tinagdan ni Duterte kang Rama, senyales nga wala na kini sa listahan.

Ang listahan matud pa niagi og makuting balidasyon. Kun unsay hinungdan pagkatangtang ni Rama ang naghimo niini ray nasayod.