Death penalty ibalik

Naukay dili lang ang Sugbo kondili ang tibuok nasud sa linuog nga pagpatay sa usa ka 16 anyos nga tinun-an didto sa Barangay Bankal sa dakbayan sa Lapu-Lapu niadtong Domingo.

Patay na nga nakit-an   didto sa usa ka bakanteng luna ang biktima nga si Christine Lee Silawan. Hubo na ang ubos nga bahin sa iyang lawas ug gipanitan ang tibuok niyang nawong. Sigun sa autopsy nga gihimo sa kapolisan, way timailhan nga gilugos ang biktima bisan kun hubo siya nga nakaplagan. Duna siyay 20 ka mga dinunggaban ug gibunlot ang iyang ubol-ubol ug dila.

Tulo ka mga tawo ang gidudahan sa kapolisan nga responsabli. Nagdumili pa hinuon pagtug-an ang kapolisan sa mga detalye kinsa ang ilang gidudahan. Apan maayong didto magsugod ang kapolisan sa ilang imbistigasyon sa uyab sa biktima.

Sigun sa mga kasayuran ang akong nahipos dunay hinigugma ang biktima nga maoy katapusan niyang gikauban sa wala pa siya makaplagi’ng patay.

Tingali makahatag og katin-awan ang hinigugma unsay nahitabo niadtong katapusan nilang panagkita sa biktima.

* * *

Labihan ka lampingasan sa mga tawo nga nihimo sa krimin hinungdan nga mitumaw pagbalik ang panawagan pagbanhaw sa silot nga kamatayon. Gani ang grupo sa kababayen-an, Gabriela, mipadangat sa ilang kabalaka nga gamiton ang hitabo aron iduso ang pagpatuman og balik sa death penalty.

Dili buot ang grupo nga ipatuman ang death penalty tungod kay matud nila di ni maoy tubag sa kriminalidad kon dili ang pagpalig-on sa sistema sa hustisya dinhi sa nasud.

Ang baruganan sa Gabriela niining maong isyu maisip nga pagbudhi sa hut-ong nga ilang gibarugan. Usa ka babaye ang biktima ug menor de edad.

Dili na angayang  himuong isyu sa mga supak sa pagpatuman og balik sa death penalty nga dili tawhanon ang maong matang sa silot tungod kay dili tawo ang mga naghimo sa maong matang sa krimin kun dili demonyo.

Walay tawo nga makahimo sa ingon niini nga matang sa linoog nga krimin, busa dili angayan ang makatawo nga silot alang nila.

Nakasabot ko nga kinahanglan ang reporma sa atong sistema sa hustisya ug mao ni angayang siguroon sa representante sa Gabriela didto sa Kongreso nga sa pagpatuman og balik sa death penalty mosunod ang judicial reform.

Kini maoy tukma nilang buhaton inay nga supakon ang pagpatuman niini pagbalik.

Angayan nilang paminawon ang sintemento sa kadaghanan nga gustong mapatuman kini og balik.

Basi sa survey nga gihimo sa Social Weather Station niadtong Oktubre sa miaging tuig unom sa matag napulo ka Pilipino uyon nga ibalik ang death penalty. Singkwenta y nueve porsiento sa mga respondents sa survey buot nga kamatayon maoy silot sa mga makonbikto sa heinous crimes.