Di gihapon kalikay sa ICC
ARANGKADA - Leo Lastimosa (Banat) - March 14, 2019 - 12:00am

Usa sa labing nagsunod ug nagtuon sa kalamboan sa kasong gipasaka batok ni Presidente Rodrigo Duterte atubangan sa International Criminal Court (ICC) ug naghukngay sa mga implikasyon sa pagsugod na sa paggawas sa Pilipinas gikan sa kalibotanong hukmanan sugod karong Domingo, Marso 17, mao ang Sugbuanon nga si Atty. Ruben Carranza.

Tua siya karon magbase sa New York sa Estados Unidos isip direktor sa Reparative Justice Program sa International Center for Transitional Justice nga may base sab sa The Hague sa Netherlands, ang nahimutangan sa mga maghuhukom sa ICC.

* * *

Pinasikad sa iyang gitun-an nga mga kaso sa ICC sa Burundi ug ubang kanasuran, kumbinsido si Carranza nga nakahupot na og hurisdiksiyon ang ICC sa mga pasangil sa crimes against humanity batok ni Duterte busa magpadayon ang imbestigasyon bisan lapas sa Marso 17 karong tuiga.

Nipuno si Carranza nga mahimong way bisan unsang pahibawo nga luwatan ang ICC hangtod nga mahingpit na ang pagkuha sa tanang dokumento, ebidensiya ug testimoniya sa kaliboan ka laktod nga pagpamatay sa gubat sa drugas aron nga di mameligro ang mga saksi batok ni Duterte.

* * *

Gihulagway ni Carranza nga pakauwaw ang pag-insistir sa Malakanyang nga di mapatuman ang balaod sa ICC sa Pilipinas kay wa matuman ang batakang panginahanglan sa publikasyon sa Official Gazette, opisyal nga tigmantala sa nasudnong gobyerno, ug nasudnong pamantalaan.

Matod ni Carranza, ang Pilipinas nagbayad sa tinuig nga amotan sa ICC, nitambong sa tinuig nga tigom sa sakop nga kanasuran (si kanhi Presidential Spokesperson Harry Roque, kauban ni Carranza sa klase, ang nitambong sa niaging tuig) ug nituboy og maghuhukom sa ICC (si Atty. Raul Pangalangan).

* * *

Atol sa Arangkada sa DYAB Abante Pa, Bisaya!, gisalikway ni Carranza ang baruganan sa Malakanyang nga di magamit ang complementarity principle, nga naglatid nga maka-imbestigar lang ang ICC kon magdumili ang Pilipinas pagtagad sa gipasangil nga krimen, kay may mga kaso nga gipasaka sa mga hukmanan batok sa gobyerno.

Nipasabot si Carranza nga mapatigbabaw gihapon ang prinsipyo sa complementarity kay managlahi ang mga kaso: Ang gipasaka batok sa kapolisan nga sinugo ni Presidente Duterte mao ang mga kasong pagpatay samtang ang gipasaka sa ICC mao ang kasong crimes against humanity.

* * *

leo_lastimosa@abs-cbn.com

ICC
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with