Health Care Humanization

Miabot sa Sugbo ang wala madugta nga kasingkasing ni St. Camillus de Lellis, ang patron sa mga masakiton ug sa mga health care providers sama sa hospital diin kabahin kini sa pagbisita sa 1st class relic sa nagkadaiyang dapit sa nasod.

Ikaduhang pagbisita kini sa heart relic sa nasod diin unang miduaw kini niadtong tuig 2013 nga milanat ug hapit usa ka buwan, samtang sa iyang pagbisita karon molungtad usab hangtod sa Marso 31.

Gitumong kini aron adunay kahigayonan ang mga deboto nga maka-venerate sa wala madugta nga kasingkasing ni St. Camillus ug mopadangat sa ilang tagsa tagsa ka mga pangaliya nga unta mabati sa Labawng Makagagahum ang mga pag-ampo.

Isip patron sa mga masakiton, gilauman nga modagsa ang mga tawo kinsa adunay mga balatian sa pamasin nga mamaayo sa ilang mga sakit sa pag pangama ni St. Camillus.

Duha ka adlaw kining gibutang sa Cebu Metropolitan Cathedral sukad sa Marso 5 ug 6, samtang karong adlawa Marso 7 moadto kini sa Bohol diin mopundo sa St. Joseph the Worker Cathedral.

Pipila lang kini sa mga dapit sa nasod nga iyang bisitahon subay sa iyang paglibot sa mga deboto lukop nasod.

Gawas sa physical healing sa mga masakiton, sentro sa St. Camillus journey mao ang kaayohan sa tibook sistema ilabi na sa mga nagdala sa health care program sa gobiyerno.

Ang presensya sa heart relic naghatag kini og kahigayonan sa tanan nga motutok sa gitawag nga “humanization of health care” sa nasod.

Nagpasabot kini nga hatagan ug mas makatawhanon nga pag-atiman ang atong mga kaigsoonan nga masakiton, pagtagad nga adunay kaaghop ug kalooy.

Alang sa mga healthcare providers sama sa mga nurses ug doktor nga unta magpabiling init ang ilang commitment sa pag-alagad sa mga masakiton kansang kaayohan anaa sa ilang mga kamot, mao kini ang gipanghimug-atan ni Fr. Dan Cancinco Jr., Executive Secretary sa Commission on health Care sa Catholic Bishops Conference of the Philippines (CBCP). Maayo unta magpasulabi ang service with compassion sa mga health practioner nga dili magpasulabi sa tinagingting sa kwarta bugti sa iyang pagserbisyo sa mga tawo.

Hinoon adunay mga medical practitioners nga giuna nila ang tinuoray nga pag-alagad kinsa dili gani magpabayad o kaha magpahangyo ra pud ilabi na niadtong walay ikasarang.

Apan subo palandungon nga adunay mga hospital nga kabahin ra gani sa simbahan nga hilabihan ka mahal sa ilang rate ug dili pud kuno gani magpahangyo kun kwarta na ang hisgotan kay lagi mao ra pud ni ang ilang gisaligan sa paghatag sa maayong serbisyo sa katawhan.

Maayo unta matandog ang ilang kasingkasing sa uncorrupted heart ni St. Camillus sa paghatag ug makatawhanon nga pagpatuman sa ilang serbisyo.  

St. Camillus de Lelis, Pray for Us!