Lista lang, way kaso

Porsigido na ang Malakanyang sa pagpagawas sunod semana sa listahan sa mga politiko nga nalambigit sa gidili nga drugas o mga narco nga politiko. Kini basi sa sabot nila ni Presidente Rodrigo Roa Duterte ug Department of Interior and Local Government (DILG) Secretary Eduardo Ano.

Sigun sa pamahayag ni Secretary Ano, adunay 82 ka mga kandidato ang nalambigit sa gidili nga drugas ug 62 kanila mga magpapili pag-usab karong umaabot nga Mayo 13 nga eleksiyon. Kasagaran sa mga anaa sa lista mga kandidato sa pagkamayor ug pagkakonsehal. May naapil pod nga mga kandidato sa pagkagobernador ug pagkakongresista. Walay naapil sa mga nagpapili sa nasudnong posisyon.

Ang tigpamaba sa Malakanyang nga si Atty. Salvador Panelo mitug-an nga ang lista nga ilang ipagawas sunod semana gibasi sa mga kasayoran nga gihatag sa Israel, Amerika ug China nga nakakuha usab sa maong kasayoran pinaagi sa pag wire-tapped sa komunikasyon sa mga politiko nga nalambigit sa gidili nga drugas.

Dili ko supak sa pagpagawas sa listahan sa mga politiko nga nalambigit sa gidilli nga drugas pero akong isugyot nga pasakaan usab og kaso ang mga pangalan nga naapil sa listahan.

Ang pagpasaka og kaso sa mga anaa sa listahan makapalig-on ug makapaagni sa mga tawo ug botante sa pagtuo nga ang mga anaa sa lista nalambigit gayod sa gidili nga drugas tungod kay ang buot ipasabot niini anaa gayod ebidensiya batok sa mga nalista.

Busa makuha sa gobyerno ni Presidente Duterte ang tuyo niini sa dili pagpadaug sa mga kandidato nga nalambigit sa gidili nga drugas ning umaabot nga piniliay.

Ang nakabintaha sa pagpasaka og kaso batok sa mga nalista mao nga adunay tsansa nga madakop sila. Gawas pa niini, dako usab ang posibilidad nga makonbikto sila ug dili na makagawas sa prisohan.

Dinhi napildi na, mapriso pa gayod ang politiko nga nalambigit sa gidili nga drugas. Nunot niini, maingon nato nga nagmadaugon ang Presidente batok sa mga narko nga politiko.

Kun lista lang ang ipagawas ug dili pasakaan og kaso ang mga nalista ang buot ipasabot niini walay lig-on nga ebidensiya ang gobyerno batok kanila.