Estado sa drugas

Hapit moabot sa duha ka gatos ka milyon ka pesos ang balor sa drugas nga nasakmit sa kapolisan sa mga tigpayuhot niini sa Barangay Inayawan, Dakbayan sa Sugbo ug sa Lungsod sa Consolacion sa Lalawigan sa Sugbo.

Giingon nga ang gidili nga drugas nga nasakmit gikan sa National Bilibid Prison ug gipalusot kini sa usa ka piniriso sa nahisgotang bilanggoan. Bag-o sa listahan sa mga polis ang pangalan sa mga nadakpan.

Asa na ba napunta ang kampanya sa gobiyerno batok sa gidili nga drugas human gilusad ni Presidente Rodrigo Roa Duterte ang gubat batok niini?

Unsaon man nato sa pagsabot ang mga nagbaha nga drugas nga nasakmit sa atong kapolisan, bunga ba kini sa ka epektibo sa kampanya sa gobiyerno batok sa drugas o timailhan kini sa kapakyas sa kampanya sa gobiyerno batok sa nahisgotang suliran? Sigun sa pamahayag ni Duterte mokabat na sa pito ngadto sa walo na ka milyon ka mga tawo sa Pilipinas ang adik. Makapadismaya kining maong balita tungod kay sa akong pagsabot wala mamahimong epektibo niini ang kampanya sa gobiyerno batok sa gidili nga drugas, tungod kay inay mogamay ang mga adik nanaghan man hinuon. Ambot, unsa pod ang inyong pagsabot.

Niadtong 1972 ang Pilipinas aduna lamay bieyente mil (20,000) ka mga adik. Kining maong gidaghanon sa mga adik nakapaalarma na ni Presidente Ferdinand Edralin Marcos maong napalabang ang Dangerous Drugs Act of 1972 sa tumong ug tuyo nga masumpo ang gidili nga drugas.

Apan sa tuig 2001, ang Dangerous Drugs Board ug Philippine Drug Enforcement Agency, sa datus nga ilang gipagawas mitug-an nga miabot na sa 3.4 ka milyon ka mga tawo ang adik sa Pilipinas. Karong tuiga 2019, ang Presidente mitug-an nga anaa na sa pito ngadto sa walo ka milyon ang mga adik sa nasud. Kamo, dili mo makapangutana sa inyong kaugalingon naunsa ang kampanya sa gobiyerno batok sa gidili nga drugas?

* * *

Mikompisal ngadto sa mga polis si Franz Sabalones nga siya drug lord maong gianggaan siya og self-confessed drug lord. Apan bisan pa man sa iyang pag-angkon wala siya pasakahi og kaso. Mao kini ang hinungdan nga nagpabiling gawasnon si Franz Sabalones. Mangutana lang ko sa mga polis, nganong wala man ninyo kasohi ang miangkon nga drug lord? Makalibog usahay ning atong kapolisan kay dali ra kaayo nga makapasaka og kaso niadtong mga tawo nga ilang dudahan pero dili mipasaka og kaso niadtong miangkon na.