Anti-palo bill maot

Walay responsableng ginikanan nga wala mahigugma, mag-amping ug magpangga sa ilang anak. Kini tungod kay ang dugo nga naglatay sa ugat sa ilang liwat, gikan man sa masig ka kasingkasing sa inahan ug amahan nga nagkahigugmaay.

Kun luparon ko’g balik ang pagkabata, makita ko kadtong gibuhat sa mananagat namong silingan ngadto sa nakasala nilang anak.

Gisulod nila’g sako si Nonoy (katalirongan nako) nga pinabitay ang tiil, gihigot sa pangki ang sako ug gihapsan sa amahan taman sa ginhawa ang kinatibuk-ang lawas sa nagsiyagit-naghilak nga anak kang kansang sayop, nakalimot lang pagsag-ob og tubig sa poso.

Walay Commission on Human Rights kaniadto. Sa among eskuylahan, gitudloan mi sa among titser og ‘Mind your own business.”

Mao tingale, nga among silingan nga gustong motabang sa pait kaayong kahimtang ni Nonoy, kutob ra intawon sa kaluoy. Dili gyud makahilabot.

Niining bag-o, may mga magbabalaod nga mipanday og Anti-Palo Bill.

Miingon ang mipabor niini, nga ang sobrang pagbunal kuno sa ginikanan ngadto sa anak, makapapating pagsamot sa bata. Dili gyud ko mokomporme! Ngano?

Tungod kay kutob sa mga anak nga nakatilaw og bakos, sanga sa bayabas o uban pang matang sa bunal, silang tanan, lakip na si Nonoy, nahimong mga buotan, masunoron ug well-disciplined citizens.

Ako mismo, nagdako sab nga pirmeng makatilaw og latigo nilang Tatay ug Nanay. Dinhay higayon gibundakan ko’g banga ni Tatay.

Maayo gani kay gipunit kong Nanay ug didto ra sa salog ang tadyaw napusgay.

Miluom ko pag-ayo. Silang duhang Nanay nakuyawan. Nagkabuang og tabang nako.

Didto akong naanalisar, nga ang pagbunal nila nako, dili diay tungod sa kasuko.

Kondili, sa dako nilang gugma ngari nako.

Wala ko magmahay. Kay dili unta nako maabot ang unsay akong nahimutangan karon kun wala pa ko nila disiplinaha og ingon niadto.

Mao nga dihang may balaodnong Anti-Palo nga gipanday, gusto gyud kong supakon kini.

Kay kining maong balaod, maka-spoiled lang sa nagtubong bata. Ug wala magtudlo nila’g disiplina.

Busa, maot!  Maayo gani, kay si Tatay Digong usa sab ka disciplinarian. Ug gipugngan niya ang Anti-Palo nga mahimong balaod.

*  * *

Naamang ang kalibotan pagkakita sa pipila ka anino, kinsa may mga bating tunob nga gibilin sa ilang kagahapon nga giapil pag-isa ni Presidente Rodrigo Duterte ang mga lapoko’g kamot agig pag-endorso nila isip mga kandidato sa nagkalainlaing puwesto sa gobiyerno ning umaabot midterm election.

Sa Facebook, sa kan-anan, sa tubaan ug bisan sa barberohan, nakamugnag lainlaing komentaryo ang mga talan-awon nga gikuwadro sa internet, telebisyon ug kamantalaanan, diin naglabi ang negatibong pagtuaw: “Naunsa man ni si Tatay Digong, uy, nagpatuyang man lag pasawsaw ning mga anino, kinsa dili gyod angay nga iyang iipon sa maayo?

Si Duterte misikat ug midaog tungod sa duha niya ka higanteng misyon: ang pagpayhag sa illegal drugs syndicates ug ang pagpapas sa kurapsiyon diha sa gobiyerno.

Busa, nagkinahanglan siya’g honest and loyal public servants, kinsa andam mobuhis sa ilang kinabuhi, aron pagtabang taman sa ginhawa nga kining iyang imposibleng damgo matuman.

Ang pangutana mao: Kining tanan niyang gi-endorso, pulos ba limpiyo og record diha sa pagpangalagad sa katawhan?

Wala ba maduhig ilang ngalan sa listahan sa mga drug protector diha sa natad sa narco-politics?

Wala ba sila makapangawkaw og minilyong salapi gikan sa kaban sa katawhan pinaagi sa paghimog daghang proyekto nga daw gihimong front lamang aron sila makabulsa sa hilom og dinagkong kantidad sa salapi nga adto mopaingon sa personal nilang panudlanan?

Wala ba silay p ending graft and corruption cases ug uban pa nga nag-ung-ong diha sa atong buhatan sa mga hustisya?

Tungod sa kamoderno na sa teknolohiya sa komunikasiyon, ultimong gamayng buling nga gustong tagoan sa mga politiko, mosihag gyud ug mabulgar diha sa tabiang social media.

Samot na, kay ang imbestigahong Kongresista o Senador nga nahilambigit sa usa ka salawayong kaso, i-televised. Nah, maaninaw gyud ang ilang binuhatan sa mga mata sa tibuok kalibotan.

Ang mga intelligent, wise voters adunay photographic memory. Sila nasayod kun kang kinsa kadtong mga kamot nga giisa ni Duterte sa rally sa PDP Laban.

Ang hugaw, ug hai’y limpiyo? Mao nga dili tanan niyang giendorso botaran sa iyang mga dumadapig.