Tatad gibaslag saway’ng Duterte

Gidugok sa liboang dumadapig ni Presidente Rodrigo Roa Duterte ang mitambong sa dakong PDP Laban rally nga gipahigayon didto sa Plaza Independensiya sa miaging Domingo, Pebrero 24, diin usa ray tumong: ang pagpaila ug pag-endorso sa mga kandidato, kinsa milansar sa pagka senador, gobernador, mayor ug uban pang puwesto sa politika ning umaabot May 13 mid-term election.

Sa pagsugod pa lang, si Duterte mitug-an nga may mga higayong tambagan siya ni Kongresista Gwen Garcia, nga unta likayan ang pagpamalikas samtang nagdiskurso  atubangan sa bagang duot sa katawhan.

Gipaminaw baya niya ang maong inigsuong pagpakabana, pero sama sa kape ug gatas nga nakutaw na ug nahimong usa sulod sa nag-aso-aso nga tasa, dili na gyud mabulag ang pagkahimalikas ni Duterte diha sa iyang pagpamulong bisan asa, labi nag duna siyay kasuk-an, kay nahimo na man kining kabahin sa iyang naandang batasan.

Ang pagpamalikas nakagamot na sa iyang kasingkasing.

Busa, walay si bisan kinsa ang makapahimulag niini gikan sa iyang pagkatawo.

Kining iyang pagpamalikas, gihimo niyang lamas nga tinuyong gisingit diha sa iyang pagdiskurso aron mahikatawa ang iyang mga audience ug pabiling buhi kanunay nga maminaw sa matag pulong nga manglibkas sa iyang baba gikan sa pagsugod hangtod sa kataposang unod sa isyu nga iyang iyagyag.

Atol sa rally iyang gipaambit sa katawhan ang gibuhat ni kanhi Senador Francisco Tatad, kinsa misulat og artikulo bahin sa health condition ni Duterte, nagtug-an, ang pangulo may colon cancer kuno.

Haskang hayblara sa presidente! Mibawos pinaagi sa pag-ingon:

“Si Tatad, may diabetes na…Unya kun may diabetes ka, Tatad kanang imong o_ _ _ kutob na lang ini.” Dayong bitad sa mikropono nga pinaduko ug gipahapla sa ubos.

Ug mipadayon: “Unya, sige ka’g saway nako nga masakiton? Bi, hulaman nako nang imong asawa. Ug siya na lay pasultia!”

Ay, grabeng hugyawa sa mga tawog pangatawa. Labi na kay sa sige niyag gangogango sa mikropono, naluag hinuon ni ug dili na mobarog.

Hasta mga kandidatong giendorsar niya, puwerte pung binahakhakay!

Ingon ini modalag bawos si Duterte ngadto sa mga tawo nga nanghilabot niya.

Unsa kahay gibati ni Tatad, no?