EDITORYAL - Maapsan ang Visayas
Nagkinahanglan ang Kabisay-an og aktibong mga ekonomikanhong kalihokan gikan sa komersyo, industriya ug labaw sa tanan turismo nga maoy kaniadto pa pangdani niini sa mga langyaw nga mga turista ug mga magpapatigayon.
Sa seguridad dili kaayo samok ang Kabisay-an bisan pa man sa pipila ka mga probinsyang adunay problema sa insurhensiya sa komunistang mga rebelde nga daw dili gani kaayo madungog sa mga dagkong lugar dinhi.
Kun itandi ang Kabisay-an ngadto sa Luzon ug sa Mindanao, biya kaayo kini sa natad sa agrikultura. Ang Luzon maoy arang-arang pag-abot sa imprastraktura alang sa komersyo, industriya ug bisan na gani sa agrikultura.
Samtang ang Mindanao, tungod sa pipila ka mga probinsyang gihamok sa rebelyon ug separitistang mga grupo nag-aginod sa pag-abante ug nabiyaan sa Visayas ug Luzon.
Apan ang Mindanao nga maoy ikaduhang kinadak-ang isla sa Pilipinas sunod sa Luzon mas lapad pa og mga tambok nga kayutaan nga mahimo pang kapuslan.
Lapad pa kaayong bahin niini partikular ang mga dapit nga gisalagan sa mga rebeldeng Muslim kaniadto ang wala pa mahilabti. Mahimo na kining mapuslan kun sila matutokan sa gobiyerno aron molambo.
Husto si Ilocos Norte Gov. Imee Marcos, kinahanglan sa Visayas og mga lider nga nakakita sa sitwasyon karon sa rehiyon.
Tinuod taas pa kaayo ang latason sa Mindanao aron matupngan ang Kabisay-an sa progreso niini, apan wala kini nagkahulogang dili kini mahimo sa taga Mindanao.
Kini tungod kay ang kaniadto gubot nga mga rehiyon matutokan na sa gobiyerno nunot sa pagkaumol sa Bangsamoro Autonomous Region in Muslim Mindanao.
Gawas sa gobiyerno, ang international community ug uban pang interesadong mamuhonan nakatutok ang mga mata sa Mindanao karon nga may paglaum na ang kalinaw didto.
Kun dili molihok ug mag-iya-iya lang ang mga opisyales ug tanang sektor sa pamatigayon sa Visayas hayan malabwan gyud kini sa Mindanao.
- Latest