Lahutay ni Sonny O
Ni-text ko ni Toledo City Mayor Sonny Osmeña, human siya nganli ni kanhi Pinamungajan Mayor Gaye Yapha nga maoy nagsige og tanyag ni Yapha og kuwarta aron mosibog sa iyang kandidatura pagka kongresista sa ikatulong distrito, aron mananghid nga pakighinabian nako siya sa programang Arangkada sa DYAB Abante Pa, Bisaya!
Nitubag dayon siya. Sukwahi sa nangaging mga higayon nga lisod siyang pangitaon ug mas lisod nga pakighinabian.
May mga higayon niadtong senador pa siya nga gipahuwat mi niya og pila ka semana una nahinabi mahitungod sa kontrobersiya nga nilabay na.
* * *
Apan, sama sa nangagi namong mga hangyo, nibalibad siya.
Nakugang hinuon ko sa iyang rason: Nitambong pa siya og rally; apan mahimo nako siyang tawgan human sa alas-11 sa gabii; o sa pagmata niya sa alas-5 sa pagka sunod buntag.
Tinuod gyud diay tingali ang iyang sulti namo sa una nga samtang mas hinay nang iyang lihok (83 anyos na siya sa niaging buwan) apan mobaskog siya kon piniliay.
Mas taas siya og lahutay. Nakatug na ko sa wa pay alas-11 ug nakamata ko pasado alas-6 na sa buntag (kay recorded mang Arangkada).
* * *
Dihang nagkasulti na mi sa telepono, gipanghimakak niyang pasangil ni Yapha ug nipadayag og pagsalig nga modaog siya pagka kongresista sa ikatulong distrito tungod sa gipaabot nga kapin sa 30,000 ka botong mayoriya niya sa Toledo (gihulagway niya si Pablo John Garcia nga mas higpit niyang kaatbang tungod sa dakong puntil ni kanhi Gobernador Gwen Garcia).
Gibutyag sang iyang plano nga kun makalingkod na sa House of Representatives, hinayunon niya ang pagtukod sa bag-ong lalawigan sa Occidental Cebu aron hingpit nga mapalambo ang distrito.
* * *
Dihang nagpasalamat ko niya sa paggahin og panahon pagpanubag sa mga pangutana, duna siyay hangyo: Mangayo siya sa recording sa interview kay mao pay pagkahigayon niya og pasabot sa iyang mga plano sa distrito kay pulos ra “tusik-tusik” ang iyang mga diskurso sa ilang rallies.
Nisaad ko sa pag-email sa recording kun makapamalihug sa iyang mga sinaligan sa pagpada sa iyang email address. Hangtod sa akong pagsuwat ini, wa pa koy nadawat nga email. Na-busy na sab tingali sa way kinutoban niyang rallies.
* * *
- Latest
