Iluwa nalang

Daghan ang misaka ang kilay sa proposal ni Ronald Cardema, pangulo sa National Youth Commission nga hukasan sa ilang government scholarship sa gihulagway niya nga mga “rebelious students”

Gisugyot niya kini kang Presidente Rodrigo Duterte partikukar na kadtong mga misuporta sa mga rebeldeng komunista. Ang kagawasan sa pagpadayag alang sa tanan ug dili kini angayan hulgaon o babagan ilabi na sa mga tinun-an nga nag-umol pa sa ilang kritikal nga paminsar sa mga nag-unang isyu sa katilingban.

Gani dasigon pa sila nga magpakabana sa mga isyu nga adunay kalambigitan ang lungsod sama sa estado sa edukasyon, kapobrehon ug uban pa.

Walay si bisan kinsa nga makababag niini bahala na og kapila pa sila mag rally sa kadalanan basta dili lang maapektohan ang ilang grado ug mamintinar kini base sa standard sa scholarship magpadayon ang tinon-an nga scholar.

Kung moubos o mabagsak ang iyang grado tungod kay nagsige nalang og rally, aw, tagak gyud sa iyang scholarship.

Ok ra man seguro nga makisimpatiya lang sa mga isyu nga mao usay giyangungo sa ubang grupo.

Apan lahi na nga estorya kun ang mga tinun-an dayag na kaayo nga nisuporta sa kontra sa kagamhanan nga makamugna na og peligro sa interes sa nasod.

Kadtong mga government scholars nga nisaka na sa bukid tungod sa ilang idolohiya sa pagpakigbatok sa gobiyerno, mang recruit og mga tawo aron palig-unon ang kawsa sa mga mokontra sa kagamhanan.

Salikwaot kaayo pamation nga gihatagan ka sa gobiyerno sa panginahanglan aron makatapos sa pagtoon apan ang imong isukli mao nga imong kontrahon ang nag-provide kanimo. Sama ra sa nagbuhi ka og bitin nga inig abot sa panahon mao ra usay motukob kanimo.

Simple lang, dili na angayan hukasan pa sa scholarship kun wala na gyud makauyon sa pangagamhanan, mas maayo nga sila na mismo ang mosalikway sa suporta gikan sa gobiyerno nga dili na nila matulon.

Sama ra sa gigastohan ka sa imong ginikanan unya sige nimo og tulisok nga wala silay silbi, unsa kahay bation sa mga ginikanan kun harap- harapan silang dauton sa mga anak.

Ingon usab niana ang bation sa gobiyerno, apan walay si bisan kinsa makababag sa katungod nato sa pagpadayag busa aron dili mabuyboyan aw, iluwa nalang daan aron dili maingnan nga mga ingrato.