EDITORYAL - Kontrobersiya sa tambalanan

Dakong kauwawan sa propesyon sa medisina ang nag-viral nga video sa Tuburan District Hospital. Karon giingong taktakon na ang tulo ka mga nurses nga giingong nalambigit sa pag-upload sa video ug uban pang mga rason.

Apan wala pa gyud masayri sa publiko kun unsa gyuy tinuod nga nahitabo gawas lang sa kuha sa video footage nga nagpakita sa makaluluoy nga sitwasyon sa pasyenteng si Gembe Casas.

Si Casas napusilan sa mga polis sa giingong buy-bust operation, kansang mga paryente kusganong mihimakak sa mga pasangil sa mga polis mao nga lain na usab kini nga imbestigasyong mahitabo.

Sa isyu bahin sa nag viral nga video, mismo si Gob. Hilario Davide III wala mahimuot niini ug gani matud niya “unpardonable” kadto ang gibuhat nga gikuhaan og video ang himatyunong si Casas.

Kun himayon og maayo, ang akto palang nga pagkuha sa video o hulagway dako nga paglapas sa pribasiya sa maong  pasyente ilabi na kun wala kini pananghid sa mga tagtungod o sa mismong pasyente.

Dako kadtong salaod sa code of ethics sa propesyon sa medisina. Kadto pa lamang nga kasaypanan makaguba na kadto og karera sa mga tawong nagbuhat niini.

Apan dili unta angay makalimtan ang kung unsay senaryo nga nakita diha sa video.

Ang kadagkoan sa Provincial Health Office daan nang miingon nga wala silay nakitang lapso sa aksyon sa hospital personnel. Apan duna tingali laing video nga nakita ug dili ang nikatap sa social media nga maoy gibasehan sa PHO maong nakaingon silang way lapso.

Tungod kay sa nag-viral nga video  wala man atimana sa hospital staff ang pasyente. Way gitaod nga oxygen o dextrose o bisan nalang staff nga mikupot sa pasyente aron di matagak sa gihigdaan kay nagsige og limbag-limbag.

Kun ang maong viral video maoy basehan salawayon kaayo nga wala gyud nila tabangi ang pasyente. Dili rason ang pagsige og pangluwa aron pasagdan kini maglimbag-limbag tungod kay nag-apas sa iyang ginhawa ang pasyente.