Bugas sa mga habal-habal drivers

Ang kagamhanan sa dakbayan sa Sugbo magsugod na karong Domingo sa pagpanghatag og mga sinakong bugas-humay ngadto sa mga drayber og habal-habal, apil ang mga Angkas drivers, nga mga lumolupyo ug botante sa siyudad.

Tabang kini sa City Hall pinaagi sa sugyot ni Mayor Tomas Osmeña kay daghan kaayong mga Angkas drivers ug mga habal-habal nga miundang na gyud sa pagpamasahero kay nangahadlok nga madakpan unya sila ug makabayad na hinoon og dakong multa.

Usa kanila ang akong anak nga sakop sa Angkas ug karon wala na mamasahero kay mahadlok nga madakpan tungod kay ang Land Transportation Office (LTO) ug pipila ka mga polis, usahay mopahigayon og pagpanakop sa mga habal-habal ug Angkas drivers.

Sa interview namo sa mga reporters, gikataw-an ra ni Mayor Osmeña ang giingon niyang “fake news” sa iyang mga kaatbang sa politika nga nagsabwag og sayop nga kasayuran aron masuko ang mga drayber og habal-habal ug Angkas.

Gipalakaw nga tabi-tabi sa mga kontra ni Mayor Osmeña nga kaniadtong Disyembre manghatag ang City Hall og bugas, bisan og wala gyud mag-ingon ang mayor nga sa maong buwan kini manghatag. Dayon gipalakaw na usab ang tabi-tabi nga dili na modayon ang paghatag og bugas sa City Hall.

Tungod sa maong fake news, may mga habal-habal drivers nga nasuko kang Osmeña kay nagtuo sila nga namakak ra ang mayor.

Pastilan bitaw ning politika, bisan unsa na lang ang mahunahunaan. Matud ni Assistant City Administrator Annabeth Cuizon nga karong Domingo na magsugod ang pagpanghatag sa bugas, sulod sa 15 ka adlaw. 

* * *

Uy, diay nindot nga balita sa mga senior citizens dinhi sa dakbayan sa Sugbo. Kadtong mga narehistro ug nakabotar dinhi sa siyudad sa Sugbo kaniadtong 2013, malakip na sa makadawat og P12 mil nga cash assistance gikan sa City Hall.

Kana kun maaprobahan sa City Council ang gisugyot nga ordinansa ni City Councilor Eugenio Gabuya Jr. nga maghimo og gamay’ng kausaban sa ordinansa kabahin sa paghatag og tabang salapi sa mga senior citizens.

Pagkakaron, kadto ra nga mga nakabotar dinhi sa siyudad sa miaging 2010 maoy gitugotan nga makapahimulos og P12 mil nga cash assistance gikan sa City Hall.

Nindot kaayo kining maong tinguha ni Gabuya ug angay siyang pasalamatan sa mga senior citizens kabahin niini.

Ako ra ba, hapit na mahimong senior citizen, apan wala hinoo’y problema kay lumolupyo ug botante ko sa dakbayan sa Sugbo sukad pa kaniadtong batan-on pa ko.

Mao bitaw nga suhito ko kun unsay dagway sa dakbayan kaniadto, apan karon ang mga bakanteng public places giabusohan ug giangkon na sa mga mapahimuslanon.