EDITORYAL - Mga LGUs nagmika

Moabot 95 ka mga siyudad ug mga lungsod duol sa Manila Bay ang wala mosunod sa mga environmental laws, sumala pa sa report.

Ang kalihim sa Department of Interior and Local Government nga si Eduardo Año miingon nga lapas katunga sa 178 ka mga local government units daplin sa Manila Bay ang wala mosunod sa balaod.

Sila naa mahimutang sa Metro Manila, Central Luzon ug Calabarzon. Mao nga dili na ikatingala kun nganong pwerteng hugawa sa Manila Bay ug niining panahona lang naatiman sa Department of Environment and Natural Resources.

Nahimo kini tungod sa pangusog ni Pres. Duterte kinsa mimando nga palimpyohan dayon ang maong baybayon. Ang maong baybayon inila kaayo tungod sa kaanindot sa talan-awon matag mosawop ang adlaw.

Apan sa pagdagan sa mga katuigan, nagkaanam og kawagtang ang kasidlak niini sa mga mata sa mga tawo gawas nalang sa mga libudsuroy nga gipili nga anha nalang magpuyo inay mamauli sa ilang mga probinsya.

Dinhi sa Sugbo, pila sab kaha ka mga LGUs ang nakalapas sa mga environmental laws? 

Dinhi palang sa Mactan Channel nga sama sa Manila Bay makasaysaynon sab alang sa mga Cebuano, ning bag-ohay lang may nadiskubrehang mga basura gikan sa mga tambalanan.

Ang mga siyudad duol niini sama sa Cebu City, Mandaue City, Lapu-Lapu City ug bisan gani ang Talisay City nagyabo usab og mga tubig gikan sa ilang mga kanal nga anha gipadagayday sa mga ilang mga kasapaan.

Gani daghan sa mga sapa sa Metro Cebu ang opisyal ng gideklarar nga patay na. Dili magdugay madugangan pa kini kun ang mga LGUs padayong magmika sa pagprotihir sa ilang kalikopan kay giuna ang ekonomikanhong kalihokan sa ilang mga dapit.