Nagpustaanay kinsa ang modaog

Nadugangan og P904 milyones ang panudlanan sa Dakbayan sa Sugbo kagahapon kay mihatag na usab ang Filinvest Land Incorporated (FLI) og bahin sa siyudad gikan sa gisudlan niini nga Joint Venture Agreement.

Ang siyudad mitugot sa FLI nga tukoran og mga medium ug high rise buildings ang 49 ektaryang yuta sa City Hall diha sa SRP ug ang dakbayan modawat og 10 porsiyento nga bahin.

Ang yuta gipanag-iya gihapon sa kagamhanan sa dakbayan. Sukad kaniadtong 2009, ang siyudad nakadawat na og bahin nga dul-an sa dos bilyones pesos.

Nindot unta kun ang maong kuwarta gikan sa bahin sa kita sa FLI gamiton kini sa pagpatukod og karsada gikan sa SRP paingon sa Poblacion, Pardo.

Bisan si Konsehal Joel Garganera nangindahay niining maong karsada kay nakabantay siya nga nagdasok na kaayo ang mga sakyanan nga moagi sa Natalio Bacalso Avenue ug ang uban niini adto mopaingon sa SRP.

Pagkakaron, ang bugtong agianan paingon sa SRP gikan sa Natalio Nacalso Avenue mao ra gyud ang access road sa Mambaling nga layo pa kaayo gikan sa Pardo. 

Hinoon, dugay ra nga giplano kini ni Mayor Tomas Osmeña nga makabutang og dugang access road diha sa Pardo ug diha sa Alaska, Mambaling aron modugtong paingon sa SRP.

* * *

Supak baya sa balaod ang pagpustaanay, ilabi na kun maglambigit kini og mga kandidato.

Dunay upat ka maghigala nga nagkalingaw og pustaanay, pero dili kuwarta ang ilang ipusta, kondili binotelyang beer.

Kataw-anan lagi kaayo kay ang ilang gipustaan kun makakuha ba og 120,000 botos si Kongresista Raul del Mar batok ni Richard Yap sa eleksiyon dinhi sa dakbayan.

Silang tanan walay lalis nga lig-on ug modaog gyud si Del Mar nga nakagamot na diha sa Cebu City north district.

Apan kay artista man lagi si Yap, nagtuo sila nga makakuha sab kini og botos. Ang usa sa upat maoy nangita og paagi nga sila magkapustaanay gyud.

Gihagad ang tulo niya ka amigo nga pustaanay sila og tagsa ka bucket nga beer.

Kun ang botos ni Del Mar dili kaabot og 120,000 aw daog ang nanghagit. Apan kun labaw nga botos ang makuha ni Del Mar, aw makahatag siya og tulo ka bucket nga beer.

Hangtud nga ang pustaanay niabot man sa Mandaue, kun kinsa kanila Mandaue City Mayor Luigi Quisumbing ug Jonas Cortes ang modaog.

Ingon niini ang sitwasyon karon sa politika, daghan ang nagpustaanay kun kinsa ang modaog sa mga nagkaatbang nga kandidato, apil sila si Mayor Tomas Osmeña ug Vice Mayor Edgar Labella.