Mahal nga bayad sa parking

Nganong mas mahal man ang bayad kon moparking kita sa mga parking bay nga anaa sa daplin sa mga karsada dinhi sa dakbayan?

Sa private parking area, ang bayad P20 alang sa unang duha ka oras nga pagparking, ug tag P5 alang sa mosunod nga mga oras.

Dili na kaayo sakit sa bulsa kay kon makaparking ka og tulo ka oras, makabayad ka lang og P25. Apan kon anha ka moparking sa imong sakyanan sa mga parking bay daplin sa mga karsada dinhi sa siyudad, pabayron ka gyud og tag P20 ang kada oras, bisan og motorsiklo pa ang imong sakyanan.

Nangutana ko niini kang Konsehal Joel Garganera nga alyado sa oposisyon dinhi sa dakbayan sa Sugbo ug gipasabot ko niya nga ang tumong diay sa ordinansa, mao ang pag-discourage sa mga motorista nga moparking daplin sa karsada.

Gihunahuna nako nga husto sab kay tingali tungod kay mas dako man og mabayran kon anha moparking daplin sa karsada, momenos ang mamarking sa mga parking bay daplin sa karsada.

Apan wala gihapon magsilbe ang maong pamaagi uy kay ang mga tag-iya og sakyanan mapugos gyud sa pagparking bisan og mahal ang bayad kay sa walay kaparkingan. Kaniadto, dako ang bayranan kon moparking ka sa mga private parking bay, apan tungod sa hulga sa City Hall nga pangayoan sila og business permit kon padayon silang mangolekta og mahal nga bayad, gipakunhoran nila ang ilang gikolekta nga bayad.

Sagad P20 na alang sa unang duha ka oras nga pagparking, ug tag P5 sa mosunod nga oras. Dili na kaayo sakit sa bulsa.

Dili na lang sab ko moawhag nga menosan ang bayad sa mga parking bay nga iya sa siyudad ug gidumala karon sa pribadong kompaniya nga mobayad sa City Hall og P7.8 milyones ang tuig, ug kon dako ang ilang makolekta, ang siyudad makabahin og P10 porsiyento sa kinatibuk-an  nila nga koleksyon.

Apan dunay mga dapit nga ang pribadong kompaniya, ang Tokogawa Corporation, midugang og mga parking bay nga gipaparkingan nila og motorsiklo.

Sama diha sa dalan P. Burgos sa likud nga ganghaan sa Basilica del Santo Niño nga imbes usa ra ka linya sa mga motorsiklo ang gitugotang moparking kaniadto, karon gihimo na nga duha ka linya.

Angay kini nga tan-awon sa mga opisyal sa dakbayan, ilabi na sa mga konsehal.

* * *

May reklamo ko nga nadawat kabahin sa usa ka internetan duol sa tunghaang elementarya sa Barangay Casili, Mandaue City kay mosugot man sila nga ang mga bata magduwa og internet bisan sa oras nga tingklase.

Sigon sa akong nahibaw-an, wa say permit kining mao nga internetan ug bisan nangani og may permit pa, kalapasan sa lagda nga ang mga bata tugotan nila nga magduwa og computer, ilabi na sa oras nga tingklase. Maayo unta kon matagad kini sa mga opisyal sa tunghaan ug sa mga opisyal sa barangay, ilabi na sa mga opisyal sa siyudad.