Maharlika

Giangkon ni Presidente Rodrigo Roa Duterte nga sakto si kanhi Presidente Ferdinand E. Marcos sa iyang suway nga pag-usab sa pangalan sa nasud nga Pilipinas ngadto na sa Maharlika. Tumong niadto ni Marcos mao ang pagpaila sa nasyonalismo ngadto sa katawhang Pilipinhon human niya gipaubos sa Martial Law ang tibuok nasud nga Pilipinas.

Gusto usab nga wagtangon ni Marcos sa panumduman sa katawhang Pilipinhon ang dautan niining kasinatian sa mga panahon diin ubos pa kini sa mga katsila.

Ang pangalan man god nga Pilipinas gikuha kini sa pangalan sa hari sa Espanya nga si Philip II. Busa, colonial.

Niadtong tuig 1978 si Senador Eddie Ilarde mipalabang og Parliamentary Bill No. 195 nga nag usab sa Pilipinas ngadto sa Maharlika. Samtang niadtong tuig 2017 mipalabang usab og balaudnon si kongresista Gary Alejano nga nagsugyot sa pag-usab sa pangalan gihapon sa Pilipinas.

Gibasura sa katawhan ang sugyot nga pag-usab sa pangalan nga Pilipinas tungod kay diktador si Presidente Marcos. Samtang  wala tuki-a sa komitiba sa Ubos Balay Balauranan ang sugyot balaudnon ni Kongresista Alejano.  Karon gibanhaw ug gisugyot pagbalik ni Presidente Duterte ang pag-usab sa pangalan nga Pilipinas ngadto sa pangalan gihapon nga Maharlika.

Nganong Maharlika man? Unsa man diay ang buot ipasabot ning pulong nga Maharlika?

Gusto ni Marcos nga Maharlika ang iilis nga pangalan sa Pilipinas tungod kay ang Maharlika usa ka pinulongang Malay.

Ang Maharlika gikan kini sa pulong nga Mahar nga sa ininglis  Noble or Great ug Lika nga sa ininglis created busa kun imo nga kombinaron ang Maharlika matawag nga Nobly created or Greatly created. Sa modernong panahon ang Maharlika nagpasabot og royal nobility.

Dako pa ug latasonon ang sugyot ni Presidente Duterte nga matinuod tungod kay kun ugaling ipalabang man kini sa kongreso ug iyang pirmahan, isumitir pa kini sa katawhan aron ilang aprobahan.