Pagpangita sa shabu lab
May sukaranan bang mga pagduda nga maong way hubas-hubas ang suplay sa shabu sa Sugbo, bisan sa hiningusgan nga kampanya sa kapolisan nga nakasakmit na og minilyon ka pesos nga shabu sukad sa pagbanos sa mga opisyal nga tinudlo ni Presidente Rodrigo Duterte, kay dunay laboratoryo sa shabu dinhi sa ato.
Labing uwahing nipadayag sa pagduda mao si Senior Superintendent Julian Entoma, hepe sa Mandaue City Police Office (MCPO), human nakasakmit ang kapolisan og pito ka kilo nga shabu gikan sa panimay sud sa luhong subdivision sa Barangay Cubacob sa Mandaue.
* * *
Ang pagduda ni Entoma nisunod sa samang pangagpas ni Senior Superintendent Royina Garma, hepe sa Cebu City Police Office (CCPO), human nasakmit ang balor og P6.5 milyones nga shabu sa gidudahang durugista sa Barangay Sambag 2 sa Agosto sa niaging tuig.
Si Garma igo ra sang nidason sa nahauna nga pagduda ni Yogi Felimon Ruiz, kanhi direktor sa Philippine Drug Enforcement Agency (PDEA) sa Central Visayas, human nakasakmit og P7 milyones nga balor sa shabu gikan sa lima ka gidudahang sakop sa Almadin Drug Group niadtong 2017.
* * *
Nipasabot si Entoma sa Arangkada sa DYAB Abante Pa, Bisaya nga ang tinagong operasyon sa shabu laboratory mao ray bugtong katin-awan sa kaabunda sa suplay sa shabu sa Mandaue ug ubang bahin sa Sugbo.
Nisamot ang iyang pagduda tungod sa bodega sa shabu sa Cubacob nga ilang natultolan sa operasyon nga gipangulohan sa Regional Intelligence Division (RID) ug Regional Special Operations Group (RSOG) niadtong Biyernes sa gabii. Matud ni Entoma ang bag-ong shabu laboratories mahimo rang taguon sa mga panimay sa luhong subdivisions nga lisod panid-an sa kapolisan.
* * *
Apan way shabu laboratory nga nakit-an sa bisan asang bahin sa Sugbo sa pila na ka tuig nga pagpaniktik. Way natultolan nga susamang operasyon human nakandadohan ang mega shabu laboratory sa Mandaue nga may sud nga 675 ka kilong shabu nga balor og P1.3 bilyones niadtong 2004, o 15 ka tuig nang nilabay.
Nakonbikto ang 11 ka dinakpan, siyam mga langyaw, walo ka tuig human nasakpan ang laboratoryo. Apan hangtod karon wa mailhi ug morag wa nay nangita kinsay financiers ug tinuod nga mga utok sa mega shabu laboratory.
- Latest
