EDITORYAL - Pulos bentahoso

Way mapiling tarong lokal man o nasyonal nga mga kandidato kun ang hisgotan mao ang pagsunod sa mga regulasyon bahin sa pagpanapot og mga campaign propaganda o mga posters diha sa kadalanan. Silang tanan mga bentahoso.

Karong adlawa pa Pebrero 12 magsugod ang opisyal nga campaign period alang sa senatorial ug party list candidates nga matapos sa Mayo 11. Samtang sa Marso 29 hangtud sa Mayo 11 ang sa mga lokal nga mga kandidato.

Apan hagbay rang namilit og mga campaign posters kining mga lokal ug mga nasyonal nga mga kandidato bisan dili pa panahon sa kampanya. Gani ang uban nagsugod na gyud og pangampanya pinaagi sa gitawag nila kunohay og “pulong-pulong.”

Ang Comelec hagbay rang nagsige og pahimangno batok niini apan malalis man tungod sa teknikalidad.

Moingon ra man ang mga kandidato nga igo ra silang nangonsulta sa katawhan ug dili matawag nga kampanya ang ilang “pulong-pulong.”

Apan kun tan-awon ug paminawon ang ilang gipamulong matawag na gyud kini nga kampanya.  Unsa diay tawag ani? ‘Ayaw ko og kalimti’ dungan sa pagpaila-ila sa ilang kaugalingon?

Kabahin sab sa mga campaign posters lalisonon sab, gumikan kay makalusot man sila pirme kay moingon nga dili sila ang nanaod niini kondili ang ilang mga ‘dire hard’ supporters ug ilahang kaugalingong kabubut-on ang pagtaod niini tungod sa kadako sa pagsalig sa ilang kandidato.

Apan makita nga kining mga nagsige og pamilit og campaign posters di man mga residente sa mga barangay nga ilang gihugawhugawan.

Makita sab nga ang uban pare-pareho ra og gisuot sa ubang mga namilit og campaign posters timailhan nga organisado ug gigastohan gyud kini og dako.

Ingon ani nga mga rason lalisonon kaayo para sa Comelec. Unta magbaton og kauwaw ang mga kandidato sa ilang kaugalingon ug ngadto sa mga tawo. Nasayod ang publiko sa mga gidili busa di unta ilad-ilaron ilabi na ang mga botante.