Konseho naalarma na!

Sa sunod buwan pa gani ang Fire Prevention Month apan karong buwan sa Pebrero pa lang sunod sunod na ang sunog nga nahitabo sa dakbayan sa Sugbo.

Lak-angan ra og adlaw ang nagpanghitabo nga sunog, una ang nahitabo sa Tabok Kanal Poblacion Pardo diin kapin sa 80 ka mga pinoy-anan ang naugdaw.

Gisundan kini sa mas dako nga sunog sa baranggay Ermita diin tulo ka sitio ang apektado. Dul-an sa 300 ka panimalay ang naugdaw sa sunog sa naasoyng baranggay.

Samtang halos magkadungan ang sunog sa sitio Calero, Baranggay Tinago diin 15 ka balay ang naugdaw ug usa ang namatay nga molupyo, Sa sitio Paradose 2 sa baranggay Kinasang-an usab 30 ka mga balay ang naugdaw sa sunog.

Komon nga problema sa mga bombero ang kahuot sa agianan sa ilang mga fire trucks.

Busa gikinahanglan nga ipaubos sa reblocking ang mga dapit dili lang unta human sa sunog kun dili bisan og wala pay emergency situation kay simbako inig abot sa panahon nga adunay sunog dali ra malalihok ang mga bombero ug mapalong dayon ang kalayo.

Ang konseho sa dakbayan sa Sugbo mipaubos sa mga dapit nga nasunogan sa state of calamity.

Kini aron makagamit og pundo alang sa mga nabiktima sa sunog.

Atol sa special session, gipadayag sa mga sakop sa konseho ang ilang pagka alarma sa sunod sunod nga sunog.

Gipangayoan nila ang Bureau of Fire Protection og report sa mga hinungdan sa sunog aron mapangitaan dayon og solution aron mapugngan nga duna pay mga dapit nga maigo sa sunog.

Basin nagkinahanglan og dugang awareness campaign mahitungod sa mga angayan ug dili angayan himuon aron makalikay sa disgrasya.

Apan ang katawhan mismo ang angayan mag amping aron dili mahiagom sa trahedya.