Cash assistance pirmado og lain, makahibulong
Bisan ginagmay, lami kaayo paminawon sa dughan ang cash assistance nga ihatag sa OSCA, Cebu City, ubos sa pagpangamahan ni Mayor Tommy Osmeña, ngadto sa mga senior citizens, kinsa sagad may gihambin nang mga sakit ug nagkinahangla’g hinabang pinansiyal para ipalit og tambal.
Primero nakong dawat og P1,000, mora gyod kog gibayaw ngadto sa kahitas-an gumikan sa matang sa kalipay nga dili masabot! Tingale, tungod kay ang pag-abot og 60 anyos nga edad dili sayon. Sa kadaghang dautang kemikal nga gisagol pirme sa gikaon ta matag adlaw, suwerte na kaayo ang tawo nga makaabot sa senior citizen lane. Hinungdan nga dihay dato kaayo, kinsa milinya ug miapil sab pagkuha sa iyang P1,000.
Ang rason sa iyang pag-claim, dili tungod sa balor sa kuwarta (kay naa siyay daghan niini). Kon dili, gipakasama niya kining premyo. Kay bisan pa sa makutas nga pagpakigkombati batok sa mga makalilisang nga pagsulay sa kinabuhi, nakab-ot gyod niya ang bandera sa senior citizen.
Sa miaging Pebrero 4, Lunes, miadto ko sa Cebu City Hall aron kuhaon ang akong senior cash assistance.
Nalipay ko kay ang nahimutangan sa lamesa, diin adto nako kuhaa ang kuwarta luag. Ako pa gyod dayon ang sunod sa naabtan kong mi-claim sab sa iyaha. Apan nahibulong ko. Kay bisag gitagaan na siya, wala gihapon mobarog. Nakig-istorya pa siya sa tighatag. Unya, nauntol ko dihang gitunolan niya ang tighatag og P100 dungan ang pag-ingon: “Pang-snacks nimo, Dong!” Pagka generous nga senior citizen!
Sa dihang akoa nang turno, gibukhad dayon sa tighatag ang listahan human nako itunol akong senior ID. Ug sa nakit-an na niya akong ngalan miingon siya: “Pirma lang, Sir!”
Haskang kunota sa akong agtang dihang gitamdan ko ang linya nga iyang gitudlo. Ngano? Kay may mipirma nag una tupad sa akong ngalan. Gipangutana ko siya ngano man kadto? Iyang tubag kay gisirkolohan ra kuno niya. Tinuoray, gisirkolohan niya akong number. Pero ang kolor sa bolpen, pula! Samtang ang bulok sa pirma nga akong gireklamo, itom!
Hinuon, gihatag gihapon niya akong P2,000. Pero wala gyod niya mahatagig eksaktong tubag akong pangutana nga puno sa tumang kahibulong. Wala kahay nagpahiping binuang likod sa maong sayop?
- Latest
