Ang kayo

Sunodsunod ang sunog nga miigo ning semanaha dinhi sa siyudad ug lalawigan sa Sugbo.

Niadtong Domingo sa buntag naigo og sunog ang Tabukanal, Pardo ug nianang pagka hapon miigo usab ang sunog sa Tangke, Talisay.

Niadtong adlaw nga Martes lain na usab nga sunog ang miigo sa tulo ka sityo sa Barangay Ermita nga tungod sa ka dako sa maong sunog milanat gayod og tulo ka oras ang pagpakigkumbati sa mga bombero sa ilang pagpawong sa kayo.

Ang dakong sunog sa Barangay Ermita nagbilin og moabot sa tulo ka milyon ka pesos nga danyos, milamoy sa 200 kapin ka mga panimalay, miwagtang og kapoy-an sa lima ka gatos ka pamilya ug sobra sa duha ka libo ka mga tawo.

Ang sunog mugna sa kayo nga dili mahigalaon. Adunay duha ka klase ang kayo, mahigalaon (friendly fire) sama sa kayo nga atong gigamit sa pagluto ug dili mahigalaon (hostile fire) sama sa kayo sa sunog.

Ang sunog malikayan kun ang kayo pugngan. Adunay duha ka hinungdan nga nakatampo sa pagdako sa kayo nga miresulta sa sunog, una, gibiyaan ang kayo.

Ang kayo mapugngan kun gamay pa kini ug dili pasagdan nga modako. Ang kayo dili makadako kun mapalung dayon kini.

Apan kasagaran, inig ka kita nato sa kayo bisan gamay pa, dili nato palungon, hinuon atong biyaan kay maoy atong unahon ang paghipos sa atong mga butang.

Ang resulta, samtang nagkapuliki ta sa paghakot sa atong mga botang, nagkalingaw pod og kaon ug nagpadako sa iyang kainit ang kayo.     

Ikaduha, ang ka kulang sa pagpakabana. Sigun sa balita, posporo ang hinungdan sa kayo nga mimugna og sunog.

Bata sa usa sa mga nasunogan ang nakit-an nga nagduwa og posporo. Kun nakita ang bata nga nagduwa og posporo nganong wala man kini badlunga sa nakakita?

Kun gibadlong pa unta kini sa nakakita, wala untay masunogan.