Batang kriminal?

Nagpabiling init ang debate mahitungod sa pag paubos sa pangidaron sa mga bata nga malambigit sa krimen.

Gikan sa 15 anyos himoon na kining 12 anyos tungod lagi kay daghan na mga bata ang nalambigit sa krimen o gigamit sa krimen.

Ang uban magkisi kisi gyud nga kinahanglan silotan ang mga bata nga makahimo og krimen ilabi na kadtong nabiktima mismo sa krimen.

Pero angayan usab seguro nato tan-awon unsay implikasyon niini, sa linghod nga pangidaron wala pa gyud sa saktong paminsar ang mga bata.

Gikinahanglan unta ang paggiya kanila, una sa mga ginikanan apan wala man magtagad ang mga ginikanan kay mismo sila maoy dautang ehemplo sa ilang mga anak.

Dili lang nako ma-imagine ang usa ka 12 anyos iipon sa mga dagkong kriminal sa bilanggoan.

Hilabihan ka dasok ug huot ang mga jail facility sa atong nasod, sama ra sa gilawog nato sila sa mga buaya hangtod nga mahimo usab sila nga sama kanila.

Kung ingon naman lang niini nga pabata ang paghimong kriminal, aw mahimo usab nga usbon ug paubsan ang edad sa mga magpakasal gikan sa 18 anyos himoon nalang usab nga 12 anyos apil na ang edad nga mahimong makapanarbaho ang mga bata.

Iratsada nalang nato kay duna naman kahay discernment ang 12 anyos nga makahimo og krimen.

Bitaw angayan hinuktokan kining maong lakang kay basin makapasamot ra kini sa problema nga atong giatubang.