Mora’g nangluod si Sinas

Una kuno nga magparelibo sa iyang katungdanan si Chief Superintendent Debold Sinas kung makadesider ang Camp Crame nga sikaran sa puwesto ang iyang mga tawo kun dili masulbad sa daling panahon ang kaso sa pag-ambush kang San Fernando Mayor Lakambini Reluya dili pa lamang dugay.

Daan nang nanganti si Philippine National Police Director General Oscar Albayalde nga iyang relibohan ang direktor sa Cebu Provincial Police Office ug ang hepe sa Talisay City Police Station kun dili masulbal ang maong kaso sulod sa duha ka semana.

Kuyaw kun mahitabo kana. Kini tungod kay mora og hinay man ang dagan sa kaso.

Sa akong pagsulat niini, giadmiter sa kapolisan nga 50 porsiyento pa kuno sila sa ilang imbestigasyon sa maong kaso.

Sa lakang ni Sinas, ang direktor Police Regional Office-7, mora og iyang gitapin-an ang iyang mga tawo. Unsa kahay iyang ipasabot niining iyang kaandam nga magparelibo gikan sa Central Vsayas kun dili masulbad and maong kaso sulod sa maong deadline?

Hinuon bilib ko sa labing gamhanan nga pulis sa rehiyon. Iyang gipakita nga hangtud sa katapusan, iya gyung duphan ang iyang mga tawo.

Kana maoy usa ka tinuod nga opisyal, andam mosapupo sa iyang mga sumusunod.

Apan, sa laing bahin, dili usab maayo ang iyang sugyot nga magparelibo siya pag-una sa iyang mga sakop kon ugaling molahos gayud sa deadline ug dili pa sila ka sulbad sa ilang imbestigasyon sa pagbanhig kay Mayor Reluya.

Daghan hinuon ang nakamatikod nga mora na hinuon og tinalawan kana nga desisyon sa pangulo sa kapolisan sa Central Visayas.

Kini gumikan kay nagpakita kana nga misurender kini sa dakong pressure gikan sa Campo Crame alang dali nga pagsulbad sa maong dugoon nga kaso.

Angay unta nga kutawon ni Sinas ang iyang mga batos diha sa PRO-7 nga nag-imbestigar karon sa pagtutok gayud sa maong kaso aron nga kahatagan sa tukma nga hustisya ang mga biktima.

Kay kon mangluod si Sinas ug piliong magparelibo, sama ra nga mitalaw siya sa hagit sa iyang hepe.