Krisis sa basura sa mga ospital
ARANGKADA - Leo Lastimosa (Banat) - January 26, 2019 - 12:00am

Mabalak-on nga nagpatabang ang mga tagduma sa labing dagkong mga tambalanan sa Metro Cebu ni Regional Director Jaime Bernadas sa Department of Health (DOH) sa Central Visayas unsaon paghipos ang nagtipun-og nila nga makahilong mga basura human gisuspenso ang usa sa labing dako nilang pundohanan?

Nakatugkad si Bernadas sa sukaranan sa ilang kabalaka. Kuwang nang daan ang mga pundohanan, nasamotan pa gyud dihang gikandadohan sa Mandaue City Hall ug Environmental Management Bureau (EMB) ang Davao City Environment Care Inc. (DCECI) human gilambigit sa mga basura sa mga tambalanan nga nag-utaw-utaw sa kadagatan.

* * *

Atol sa among panagsulti sa Arangkada sa DYAB Abante Pa, Bisaya!, akong gipangutana si Bernadas pila man ang iyang banabana sa mga basura sa mga tambalanan sa Metro Cebu nga nagtumpi samtang nangita pa sila og alternatibong mga pundohanan.

Banabana ray iyang gihatag pinasikad sa gidaghanon sa basura sa Vicente Sotto Memorial Medical Center (VSMMC): Matag higdanan may 500 ka kilo nga basura matag buwan.

Mas makapakugang ang banabana sa EMB: Tanang tambalanan sa Metro Cebu may kinatibuk-ang basura nga 15 ka tonelada matag adlaw.

* * *

Sa iyang bahin, nipasalig si EMB 7 Director William Cunado nga masulbad na sa mosunod nga mga adlaw ang krisis sa mga basura sa mga tambalanan nga gikabalak-an nilang Bernadas ug sa hospital administrators.  Gi-aprubahan na sa ilang ulohang buhatan ang lisensiya sa Aquilini Mactan Renewable Energy Inc. Kansang modernong makina sud sa Cebu Light Industrial Park sa Lapu-Lapu City may kapasidad sa paghipos og hangtod sa 75 ka tonelada nga basura sa mga tambalanan matag adlaw.

* * *

Nipasabot si Cunado nga lahi sa nag-unang treatment plants sa Metro Cebu nga naproblema kay hapit na moawas, ang Aquilini maka-pulbos sa makahilong mga basura sa mga tambalanan, makahimog semento gikan sa abo ug makamugna og elektrisidad sa proseso.

Sa reklamo sa mga tambalanan sa kamahal sa bayranan, nga posibleng maoy hinungdan nga wa sila maglumba pagkontrata sa Aquilini, nitataw si Cunado nga di na manginlabot ang EMB. Nipahinumdom hinuon nga mas taas ang bayranan sa susamang mga planta sa Metro Manila.

Ug nga mas dako ang kadaot kun padayon ang mga tambalanan nga mamasin sa iresponsable nga service providers.

* * *

leo_lastimosa@abs-cbn.com

 

OSPITAL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with