May mass songs nga di friendly

Kada misa-nobena alang sa kapistahan ni Señor Santo Niño, dugokon gyud sa bagang duot sa manimbahay. Gikan sa unang misa sa buntag hangtod sa kataposan inig ka gabii, nagsugwaksugwak sa grabeng kadaghan ang sulod ug gawas sa Basilica Minore del Santo Niño de Cebu Pilgrim Center nga gidagsaan sa mga Romanong Katoliko nga magtutuo.

Kadaghanan nila, gikan intawon sa layo ug nagkalainlaing lungsod, probinsiya, siyudad ug nasod, kinsa misakripisyo lang gayod pagbiyahe dinhi sa siyudad sa Sugbo aron solemneng makatambong sa kinatibuk-ang misa-nobena.

Sagad kanila, nakasinati na’g milagro ni Sr. Santo Niño. May pipila, nga naayo sa sakit, kinsa gideklarar sa mga doktor nga wala nay kaayohan. Ubay-ubay’ng magtiayon, kinsa wala makabaton og anak sulod sa siyam ka tuig nga panagluon, ang nakaanak og usa, duha…unya may kaluha pa!

Kini sa walay pagkuwenta sa minilyong nurses ug OFWs nga atua na sa lainlaing nasod nanarbaho ug dagko na kaayog suweldo ikomparar niadtong dinhi pa sila nangalagad.

Kini ang rason nganong kadtong atua na manimuyo sa America, Canada, Dubai ug uban pang nasod, mouli gyud og Cebu panahon sa mga adlaw nga saulogon ang kapistahan sa patron nga Bata aron magpasalamat sa tanang grasya nga ilang nadawat gikan Kaniya.

Busa, tinguha gyud nila ang makasabat pagtarong sa misa nga ipahigayon sa nagkalainlaing Pilgrim priests, kinsa nadestino  sa nagkadaiyang parokya.

Apan subo kaayong paminawon nga may pipila ka parish pilgrims nga usbon ug bag-ohon sa ilang choirs ang naandang tuno sa mga mass songs nga hagbay rang nakat-onan sa katawhan. Hinungdan, nga ang gustong moapil sa pagkanta, mahimong amang ug igo na lang intawon sa pagpaminaw.

Unsa man diay ning mga awit sa misa, singing contest? This sounds very unfriendly.  Dili ba mas nindot kun ang tanang nanambong, makaapil sa pag-awit?

Unya, unsaon man pagsabat sa kinatibuk-ang panon sa nanimba kun ang choir ray nahibawo sa kanta? Nagpasabot ba kini nga ang choir ray gustong malangit? Apila sab tawon mi, uy, Fathers!

Talahurong Cebu Archbishop Jose Palma, puwede ba, ang naandang kantahonon sa Santos nga Misa kada Domingo sa simbahan, mao puy gamiton ning nagdagang misa-nobena ni Sr. Santo Niño? At least, everybody can participate.