Santo Niño milagroso gyud

Kon unsa kadaghan ang nagsakripisyo sa pagtambong sa Opening Salvo, Walk with Jesus, unang misa-nobena hangtod na sa Walk with Mary, patighulog sa adlaw sa Traslacion, ngadto na sa Fluvial Procession sa buntag ug Solemn Procession of the Miraculous Image of Senior Santo Niño de Cebu pagka ala una sa hapon, (Bisperas sa Kapistan sa Balaang Bata), ingon niini usab kadaghan ang nahatagan nag milagro ni Senior Santo Niño.

Tingale, dili pa tanan ang nakatilaw. Ang uban, coming pa. Kay miingon baya Siya:

“Panuktok kay ablihan ka. Pangayo, ug ikaw makadawat.”

Ako mismo, makapruyba nga dakong tinuod ang Iyang gisulti.

Tanan nakong gipangayo, iyang gihatag. May panahon lang nga madelatar ang uban, pero kon ihatag na Niya, mas daghan pa kay sa akong giyangongo.

Kadto lang  naundang ko pag-eskuyla tungod sa kawad-on, iya kong gigiyahan sa hustong dalan aron makatiwas.

Si Rev. Fr. Cris Mostajo, CSSR, sa introduksiyon sa iyang homiliya sa alas 5:30 sa buntag misa-nobena sa Pilgrim Center niadtong Enero 15, misaysay nga sa pipila ka adlaw, diin naghinangat ang mao niyang schedule dinhi sa Basilica Pilgrim Center, mitaas kuno pag-ayo iyang sugar, mihuboy’g maayo iyang kaapingan ug dili na makasulti.

Sa kinasingkasing pangilaba, mihangyo siya: “Senior Santo Niño, kon gusto Ka nga maka-serve ko sa misa nga imong gisangon, ayoha ko.”

Ug human sa duha ka adlaw nga ininom niyag tambal base sa giresita sa doktor, naayo siya.

Ug nahibalik ang katibuok sa iyang tingog nga miwali sa Maayong Balita atubangan sa bagang duot sa mga debotos.

Usa ka chairman ug chief executive officer sa dakong kompaniya sa Pilipinas, Tagala, nakaapil sa misa-nobena ni Sr. Sto Niño.

Nag-ampo siya sa hilom nga unta pirmahan na sa presidente ang napundong kaayohan nga hagbay rang gipaabot sa mga empleyado.

Human sa misa, nakadawat siyag text message gikan sa Malakanyang, nagpahibalo nga makigkita kuno niya si Tatay Digong.

Pipila lamang kini sa daghang testimonies diin gimatuod nga si Sr. Sto. Niño, milagroso gyod.

Kadto lang warning sa PAG-ASA nga makasinati kunog bad weather ang Cebu atol sa fluvial procession, mora gyog dunay gamhanang kamot nga mipugong. Mao nga wa makadayon.

Viva, Pit Senyor!