Buslot sa siguridad
Dakong sakit sa ulo karon sa kapolisan ning dakbayan sa Sugbo kining ilang imbestigasyon sa pagpatay kang kanhi city assistant prosecutor Mary Ann Castro, kinsa gibanhigan samtang nag-drive sa iyang sakyanan kaniadtong Huwebes sa gabii.
Kini tungod kay sigurado gayud nga hangakon sila sa ilang pag-imbestigar tungod lagi sa daghang anggulo nga kinahanglan nilang utingkayon.
Dakong personalidad si Castro ug daghang kontrobersiya ang mihapak sa iyang kinabuhi.
Lakip sa mga anggulo mao ang mga personal nga isyu ni Castro sama sa bangi sa iyang lovelife ug pamilya. Ug angay usab nga lilion ang trabaho ni Castro isip prosecutor.
Dili ikalimod nga adunay wala makaayon sa iyang mga desisyon sa iyang trabaho sa piskalya.
Hinuon trabaho sa otoridad ang pagsulbad sa kaso sa pagpatay sa maong prosecutor.
Ug kinahanglan nga buhaton nila ang tanan aron nga mapadali ang imbestigasyon ug nga mahatagan og hustisya ang linuog niyang pagkamatay.
Apan ang labing dako nga isyu niining kamatayon ni Castro mao ang nahitungod sa sigurodad nga gipatuman sa otoridad taliwala sa kasaulogan sa Fiesta Señor ug sa pagpangandam sa umaabot nga eleksiyon sa Mayo.
Daghan karon ang nakapangutana ngano nga nakahimo pa ang mga kriminal pagtuman sa ilang misyon niining panahon nga gihingusgan sa otoridad ang sigurad.
Gani, hagbay ra usab nga nagsugod ang gun ban sa Commission on Elections alang sa piniliay.
Nagpasabot ba kini nga kulang gayud ang gipakusgan karon nga sigurodad sa otoridad ning dakbayan pagpugong niadtong adunay plano nga mosabwag og kagubot?
Hinuon daghan gayud ang makaingon nga kulang nunot niining pagpatay kang Castro.
Kay kon klaro pa ang police visibility niadtong tungora,ilabina didto sa dalang Escario diin nahitabo ang krimen, makahimo kaha ang mga mamumuno pag-ambus sa prosecutor?
Sa akong tan-aw, magpanagana gayud sila gumikan sa presensiya sa mga kapolisan.
- Latest