Panghinaot sa Piyesta Senyor
Di tanan may kuwarta nga makapalit dayon og UHF ug VHF radio sets. Lahi sa Sinulog Foundation Inc. (SFI) ug Cebu City Police Office (CCPO) nga sayo kaayo ug sayon ra nga nangompra og daghang radyo.
Sayo kaayo sila nga nakapangompra kay sila ra man sab ang nagsabot sa pagrekomendar sa pagpawong sa cell sites sa mga dapit nga gipahigayonan sa labing dagkong kalihokan sa Piyesta Senyor. Labihan ra sab nilang sayona nga nakagasto kay di man ila ang kuwarta. Kondili ila man sa mga magbubuhis nga maoy labing nahasol.
* * *
Bisan ang mga may kuwarta wa maka-apura sa mga kompaniya sa telepono pagtaod dayon og landlines ug wired internet nga mao ray mapuslan sa pagpawong sa cell sites:
• Kuwang nang panahon, kun natanggong sa daghan uyamot nga katuigan ang nangaging mga aplikasyon mas lisod nga atimanon ang dinalian nga mga aplikasyon sud lang sa pila ka adlaw;
• Kuwang ang mga kawani, may telco nga gipasanginlan og Endo nanaktak og mga kawani maong napasagdan bisan ang mga reklamo sa napawong nga landlines ug nagkamang nga internet; ug
• Tungod sa naandang burukrasya nga malaktawan lang kun pangisogan sa mga hawod, sama sa SFI, CCPO ug NTC.
* * *
Hinaot nga makaamgo ang SFI, CCPO ug National Telecommunications Commission (NTC) nga dakong pagamung-among ning ilang pagpug-ok sa labing gisaligan nga paagi sa komunikasyon sa katawhan.
Hinaot nga makamatngon sila nga ang kahasol sa gikabalak-an nga pagpangatake sa mga terorista nga gusto nilang likayan wa ra sa kumingking sa aktuwal nga mas lapad nga kadaot sa mga patigayon ug mga panginabuhi, labi na gyod sa nagbuntaog nga risgo sa makalilisang nga pagkagusbat sa kabtangan ug pagkakalas sa mga kinabuhi kun simbako dunay moulbo nga mga emerhensiya ug katalagman.
* * *
Akong panghinaot nga wa lang untay:
• Mga emerhensiyang medikal (kay unsaon man sa mga pasyente pagpanawag og ambulansiya, ospital ug mananambal?);
• Mga alarma sa sunog (kay unsaon man sa mga tagbalay pagpanawag sa kabomberohan?); ug
• LPA o bagyo (kay unsaon man sa mga gibanlas pagpakitabang sa lokal nga mga opisyal? Ug unsaon man pagpaandam sa NDRRMC ang mga nameligro sa bunok sa uwan, baha ug dahili sa yuta?) [email protected]
- Latest
