Kalit lang gitaktak sa trabaho

Dear Atty. Divine,

Ang akong igsuon nagtrabaho sa usa ka kompaniya sud na sa lima ka tuig. Duna siyay gipirmahan nga kontrata  but every 5 months papirmahon na sad sila og laing contract. Karong bag-o gipahibawo sila sa employer nga kutob nalang karong katapusan sa buwan ilang employment. Way klarong explanation kun nganong gi-terminate sila. Ang akong pangutana kun dili ba diay makonsider nga regular employee ang akong igsuon nga 5 years na man siyang nagtrabaho sa maong kompaniya? Unsay dapat niyang buhaton? Daghang salamat. — Jason

Dear Jason,

Basi sa Article 280 sa atong Labor Code, kini nagkanayon nga ang usa ka empleyado makonsiderar nga regular kun kini nagtrabaho sa necessary and desirable nga trabaho sa business sa iyang employer. Buot ipasabot nga kun ang empleyado nag-perform sa trabaho nga maoy gikinahanglan sa negosyo sa employer then regular employee siya. Laing basihan nga ang usa ka employee regular siya kun nakatrabaho na sud sa usa ka tuig sa maong kompaniya. Sa kaso sa imong igsuon, magdepende kana sa nature sa iyang trabaho kun kini necessary ba or desirable sa business sa iyang employer. Apan kun siya nagtrabaho sud na sa lima ka tuig posibleng makonsiderar siyang regular kun ibasi sa mga nahaunang desisyon sa Korte Suprema nga nagkonsiderar sa mga dugay nang empleyado sa kompaniya nga regular ug dili sila mahimong taktakon nga way legal nga basihan. Ang maayo niyang buhaton mao ang pagpasaka og reklamo ngadto sa DOLE aron ipatawag ang iyang employer ug kun taktakon gyud siya mo-file siya og illegal dismissal sa NLRC. Thanks and God bless. —  Atty. Divine

* **

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon  ang inyong pangutana pinaagi sa akong column matag Miyerkules,  Sabado ug Domingo.